Menukar Ijazah

RAHATAN handak meambil ijazah anak, Ongol ne telihat begitu tegang banar. Limbah ditakoni Acil Jablay lalu bepander inya ne. “Kepiting dipusut keluar hantalu, pina teungut kelihatannya ngalu,” ujar sidin pina nahap banar lawan pantun. “Handak kepasar bebaju basah, bulik kerumah meragap bantal, handak meambil ijazah sekalinya dipintai duit ganal,” balas Ongol bepantun jua.
Mendangar dipintai duit ganal harau tekajut sidin ne. “Kada salah panderlah ikam ne Ngol,” takon sidin. “Beapa mengeramput ah Cil, iyaam wayah ini ne, sekolah semaunya ja, sudah bebayar itu, bayar ini, ujung-ujungnya ijazah ja gin menabus pulang,” padah Ongol. “Kita laporkan lawan Haji Lului lawan Haji Untat,” ujar sidin.
Handap kisah, lalu buhannya mengisahkan tentang menukar ijazah tadi. “Menurut pian nangkaya apa ne Ji,” takon Acil Jablay. “Itu kada dibenarkan, seharusnya sekolah membari jalan agar siswa to lancar mendapatkan ijazah bukannya menyuruh menukar pulang,” ujar sidin pina tegas banar bepander.
Lalu Ongol menyahut. “Kalo kaya itu Ji ai, lebih baik kada usah sekolah ginai, menukar ijazah ja cukup, buat apa sekolah lawas-lawas, bisa ja kalo Ji,” ujar Ongol pina tamam ja lawan muha. “Kada kaya itu pang Ngolai, itu tesalah pulang menurut ikam to, maksudnya, jangan terlalu mahal jua ah, kasian buhan kampung sudah harga pekat lawan gatah kada naik-naik ditambah pulang lawan beban membayar ijazah nang mahal,” sahut sidin.
Mendangar kisah sidin tadi, tedangar suara diluar rumah Haji Untat. “Ada pembunuhan, ada pembunuhan,” kuriak nang diluar rumah, sekalinya Dangut. Mendangar ada pembunuhan harau behancap buhannya nang ada didalam rumah behamburan keluar. “Dimana pembunuhnya, siapa nang dibunuh,” takon Haji Lului sambil membawa parang penabasan rumput.
Merasa ditakoni pehajian, lalu Dangdut menjawab. “Anuah Ji, Anang Gabau membunuh ayam nang takena penyakit,” ujar Dangdut. Mendangar kisah Dangdut ne harau masam muha buhannya. “Itu to kada membunuh, tapi menyembelih ayam, uh dasar Dangdut,” ujar Ongol pina nahap banar. “Maaflah, tesalah sambat tadi, seharus menyembelih sekalinya teucap membunuh,” sahut Dangdut pina supan muha. (fin)