Naik taksi

Tumatan Kampung Layat ada urusan nang diurus Ongol ne handak bulik ke Kampung Liur naik taksi, lokasi terminal taksi lumayan jauh dari wadah Ongol bemalam diwadah keluarganya. Sekitar 2 kilo bejalan batis, palar jua jauhnya.

Handak sejaman Ongol ne menuju ke terminal Kampung Layat. “Handak ke Kampung Liurkah Bang,” tagur Utuh Lengkor. “Ya, berapa jar tumatan sini kesana,” takon Ongol. “Murah ja Bang, lima belas ja,” sahut Lengkor. “Akui larangnya, kurangi pang,” ujar Ongol. “Ayu ja, sepuluh,” sahut Lengkor. “Ya sip,” ujar Ongol sambil masuk ketaksi ampun Utuh Lengkor.

Perjalanan menuju dari Kampung Layat ke Kampung Liur memakan waktu sekitar 4 jam belum lagi jalannya nang rusak. Ditengah perjalanan Ongol ne mengantuk berat. “Huaaaaah, ngatuk banar,” ujar Ongol pina menguapkan muntungnya nang ganal tu. “Guring ja Bang, kena mun sampai tujuan ulun banguni ja,” ujar Utuh Lengkor.

Handap kisah, seperti biasanya setiap buhan Kampung Liur pastiam diturunkan dihadapan kantor balai Desa Kampung Liur wadah Haji Untat begawi. “Bang, ue Bang, sampai am,” ujar Utuh Lengkor membangunkan Ongol. “Hah, sampaiamkah,” sahut Ongol sambil menyapu liur nang menitik dihiga bibirnya. “Iya dong,” ujar Lengkor.

Lalu Ongol keluar tumatan dalam taksi. “Nah bayarnya,” ujar Ongol sambil meunjuk duit sepuluh ribu. “Kurang Bang,” ujar Utuh Lengkor. “Hau, maka perjanjian diterminal tadi bayarnya Cuma sepuluh ribu, kenapa bisa kurang neh,” takon Ongol pina handak sarek. “Bujur japang naik taksinya tu bayar sepuluh ribu, tapi pian tadi guring. Jadi, bayar sewa kamar guring dong,” ujar Utuh Lengkor.

Mendangar pander Utuh Lengkor tadi harau masam muha. “Akuilah, bayar taksi lawan guring ditaksi lain lagilah. Dasar lo,” ujar Ongol sambil mengeluarkan duit lima ribuan. “Nah, ini baru sip Bang. Hahahaha,” ujar Utuh Lengkor pina lebar banaran ketawanya.

Kedatangan Ongol ne diketahui Haji Untat. “Datang Kampung Layatkah,” takon sidin. “Inggih Ji, iya am,” sahut Ongol. “Apa am oleh-olehnya ne,” takon sidin pulang. “Oleh-oleh apanyakah. Ulun ne dibongoli tukang taksi,” ujar Ongol. “Hau kenapa bisa begitu kawan,” takon sidin pina membari muar banaran.

Lalu Ongol mengisahkan. “Sebelum tulak naik taksi sudah negosiasi, bayar taksi tumatan Kampung Layat ke Kampung Liur tu sepuluh ribu. Tapi, dalam perjalanan ulun teguring. Sekalinya bayarnya handak 2 kali lipat yakni, bayar naik taksi lawan bayar sewa wadah guring,” ujar Ongol mengisahkan panjang lebar.

Mendangar kisah Ongol harau mengikik Haji Untat. “Wakakakak, ne istilah hanyar Ngolai. Dan ikam adalah pertama jadi korban supir taksi,” ujar sidin. Harau masam ai muha Ongol disambati sidin tadi. Lalu menjuur bulik kada bepadah lagiam. “Dasar Untat, jakanya dibela pang ne kada, malahan dihina. Huh,” garunum Ongol pina sangkal banaran. (fin)

Lomba badehem

Pina asik bedudukan dijembatan laluai bebinian bebaju hirang lawan selawar hirang tapi urangnya bungas dihadapan bebuhan Ongol. Karena melihat bebinian mata bebuhannya ne kada bekicip mejanaki nangkaya bidadari ja nang lewat.

Selang beberapa menit lalu pulang bebinian bebaju hijau. “Ehem,” ujar Ongol menagur. “Ehem jua,” sahut Dangdut kada handak kalah jua menagur bebinian bebaju hijau ne tadi. “Hai,” ujar Anang Gabau pina lain daripada nang lain. “Cihui tek,” ujar Utuh Lengkor umpat jua menagur.

Handap kisah, setiap ada bebinian nang bungas lewat dihadapan bebuhannya ne pastiam kada ketinggalan badehem. Nah, rupanya kada berapa menit datang Haji Untat. “Pina aur badehem ja melihat bebinian bungas,” ujar sidin. “Iya am Ji ai, sudah tradisi. Hakon gin kada bebiniannya menoleh mun didehem to,” sahut Gabau pina musti banaran.

Kada berapa menit lewat pulang bebinian awak mungkal bebaju habang pas lewat dihadapan Haji Untat. “Ehem,” ujar Haji Untat. Mendangar deheman sidin harau mengangkang bebuhan Ongol. “Hua hahahaha, haji gin umpat jua sekalinya mendehem,” ujar Ongol.

Harau habang muha Haji Untat disambat Ongol tadi. “Harau bujur ngalih mehilangkan budaya mendehem ne, hehehe,” ujar sidin membela diri. Anang Gabau, Utuh Lengkor lawan Dangdut ne aur mengikik ja melihat kelakuan Haji Untat.

Selang beberapa menit lewat Acil Jablay dihadapan Haji Untat. “Ayuam Ji, tu cewe jua nah,” ujar Gabau. Harau merangot muha sidin disambat Gabau tadi. “Itu lainan cewe lagi am, tapi sudah kelewatan. Hahahaha,” ujar Haji Untat menyambat Acil Jablay.

Rupanya telinga Acil ne tajam, harau bebalik arah mendatangi Haji Untat. “Apa jar pina tadi Ji, sudah kelewatan, hah,” takon Acil pina bemamai. Harau seraba salah Haji Untat. “Kada kaya itu pang maksud aku tu eh,” sahut sidin pina berot muha.

Pina karuan bepander, lalu Acil Jablay menjuhut sandal japit sidin, melihat Acil melepas lawan sandal harau behancap Haji Untat bukah kada meingat diri. “Jangan bukah pian Ji ai, kurang asam bebanaranlah. Aku disambati sudah kelewatan,” ujar Acil pina bemamai sambil menyasah Haji Untat.

Bebuhan Ongol ne kada meingat diri lagiam mengangkang melihat kelakuan Haji Untat lawan Acil Jablay nang besasahan keliling Kampung Liur gara-gara dehem tadi. “Amun bebinian bujang pina rami badeheman mirip lomba badehem. Pas peacilan nang lewat harau kedida seikungpun nang mendehem. Jadi, mendehem tu gasan bebinian bujang ja kalolah. Hahahaha,” ujar Gabau pina tamam ja lawan muha. (fin)

Belah duren

Sebelum tukak begawi memagat pekat bebuhan Ongol ne pastiam santai dulu di warung Acil Jablay mengupi, berokoan sambil makan geguduh begumpal makanan khas Kampung Liur. Harga sebuting seribuan.

Tuntung meulahkan kupi lawan menyanga pisang guring, lalu Acil Jablay ne bulik kerumah kada jua kenapa sidin pina bulik behancap. “Ngol, jagakan setumat warung aku ne, handak bulik dulu ada nang diambil,” ujar sidin sambil membujuri tapih pina telului. “Inggih Cil, tapi jangan lawaslah,” sahut Ongol. “Paling lawas satu jam, setumat ja,” ujar sidin menambahi. “Mun lawas kada tahuam, ne warung mun ada nang betutukar ulun kada kawa menjuali karena ulun kada tahu lawan diharga,” sahut Ongol. “Setumat ja,” gasak sidin. “Inggih ah,” sahut Ongol umpat jua mengarasi.

Handap kisah, sesuai lawan jadwal Acil Jablay ne memang satu jaman dihadang bebuhan Ongol. “Apa jar ulun tadi, dasar lawas jua ai,” ujar Ongol pina menyambat banaran pas sidin lagi datang. “Iyakah,” sahut sidin pina meriga.

Rahatan meriga tadi, rupanya bau muntung sidin tecium bebuhan Ongol. “Lagi belah durenkah tadi,” ujar Anang Gabau. “Kada pan,” sahut sidin pina menyembunyikan banaran. “Belah duren kalo, ne pina tekurihing,” ujar Dangdut umpat jua menyambat. “Siapa jar nang membelah duren ampun pian tadi,” ujar Ongol pina behimat jua menyambati sidin.

Harau seraba salah, rupanya sarek sidin tadi sudah diubun-ubun. “Mauk bebuhan ikam ne, pikiran negatif tarus,” ujar sidin pina sarek banaran. “Hua hahaha, disambat belah duren sarek sidin. Berarti bujur kalo,” ujar Gabau. Harau betambah habang muha sidin disambati bebuhan Ongol. “Bebuhan ulun tu betakon bujur-bujur Cilai, pian tadi tu belah duren kalo,” ujar Dangdut mencoba merayu sidin.

Karena rayuan maut Dangdut, harau unggut-unggut jua ai sidin. “Nah pas banaran, Acil Jablay belah duren,” ujar Gabau pina semangat banaran. Rahatan bepander pina nyaring banaran lalu datang Haji Untat. “Hah, dimana Jablay jar belah duren,” ujar sidin pina kada tahu masalahnya paan langsung ja menyambat. “Handak tahu jua pian ne, hehehe,” sahut Ongol pina tamam ja lawan muha. “Pian ne, mentang-mentang ulun jablay laluam menyambati. Ulun tu bujuran belah duren tapi bujuran duren lain duren apam keriput tupang,” ujar Acil Jablay menjelaskan.

Apada, mendangar pander sidin tadi, hinip bebuhannya. “Iyakah, nyaman ai. Apalagi duren apam keriput tu, hua hahaha,” ujar Gabau, plak, bunyi nyaring banaran sandal ditatapkan sidin kemuha Gabau. Apada harau masam muha Gabau. Harau bulik membawa muha habang ditapak Acil Jablay lawan sandal japit gara-gara ketuju menyambati sidin. (fin)