Ilmu Selisih

HARI semalam telihat cinik banar Haji Untat memikirkan anak didiknya nang banyak kada lulus lantaran itu, lalu sidin meundang bawahan membahas nangkaya apa solusi kedepannya supaya lebih baik lagi dari sekarang ne.
Mendangar undangan sidin lewat pengeras suara di langgar, maklum di Kampung Liur masih belum masuk telepon selular, mau kada mauai memakai nang ada. “Umumkan kepada bawahan agar kumpung di Aula Kampung Liur,” suruh Haji Untat ke Ongol. “Siap Ji, perintah dilaksanakan, tapi, bunyinya kaya apa Ji,” takon Ongol pina musti banar. “Bebarang ikam ja Ngolai, pokoknya suruh kumpul,” ujar sidin pina besesarekam.
Handap kisah, lawas banar sidin membari pengarahan lawan bawahannya sampai tebatuk-batuk maklum Kampung Liur wayah ne takena penyakit batuk berdahak. “Hanya itu yang bisa aku sampaikan lawan buhan ikam, pokoknya tindak lanjuti apa jar aku tadi,” ujar sidin mulai ngalu kepala. “Inggih Ji,” sahut buhannya.
Merasa ngalu kepala, lalu sidin handak bulik, maka langsung japang naik ke sepeda ontel sidin nang ditukar seharga tiga juta to. “Assalamu ‘alaikum,” ujar sidin sambil mengenjotam lawan ontel tadi. “Wa’alaikum salam,” sahut buhannya serentak sambil bulikan menuju kerumah masing-masing.
Buhannya nang lain sudah bulik, tapi tetinggal Ongol lawan Anang Gabau, kada berapa menit tekajutai Ongol ne pas ada nang dilihat dimuhara lawang Aula Kampung Liur. “Hau, sandal siapa to, maka ganal pulang,” takon Ongol. “Kadakah sandal ampun Haji Untat,” sahut Anang Gabau. “Rasanya bujur ampun sidin pang ne, kena aku umumkan dilanggar,” ujar Anang Gabau.
Lalu Anang Gabau mengumumkan lewat pengeras suara dilanggar. “Siapa nang merasa ketinggalan sandal harap datang ke Aula Kampung Liur,” ujar Anang Gabau. Merasa sandal tetinggal, harau bebulik Haji Untat maka padang ngalu kepala pulang sidin ne. “Ampun aku ne,” ujar sidin. “Inggihai, amun ampun pian, berarti kada salah paan perkiraan buhan ulun tadi,” sahut Ongol pina musti banar.
Rahatan handak bulik, sekalinya menjoor ja sidin, sekitar sepuluh meter dikiyau Ongol. “Ji, sepeda ontel pian,” kuriak Ongol. Rupanya Haji Untat ne kada mendangar paan kuriak Ongol, aur bejalan ja maklum ngalu kepala.
Bebaya sampai kerumah lalu sidin sadar. “Astaga, ontel ampun ku tetinggal pulang di Aula Kampung Liur,” garunum sidin. Apada harau bukah-bukah sidin mendatangi Aula. Bebaya sampai harau tekajut. “Hau kemananya ontel ampun ku ne,” garunum sidin. Sekalinya sidin bebulik ke Aula, Ongol lawan Anang Gabau meantarkan bulik kerumah sidin. Apada sekalinya teselisih, rupanya buhannya ne memakai ilmu selisih.
Haji Untat harau kada kawa bulik lagiam kerumah, habis tenaga sidin bukah-bukah tadi handak ke Aula, sekalinya rahatan dijalan kada melihat paan buhan Ongol lagi membawa ontel sidin. Apada bulik betandu memakai keranda mayat amun di Kampung Liur kedida transportasi selain sepeda ontel. (fin)