Bageleng

Kipas di rumah sudah hancur lalu Ongol beniat handak menukar nang hanyar mengganti nang rusak tu tadi. Urang nang bejual kipas neh kedida bejual dipasar iwak paan melainkan dipasar khusus bejual gasan keperluan rumah tangga.

Pina santai pang Ongol ne tulak menuju pasar Kampung Liur tapi melewati warung Acil Jablay. “Hau, kemana Ngol,” tagur Anang Gabau nang kebelujuran ada diwarung sidin. “Handak kepasar menukar kipas walai, mun kipas dirumah sudah hancur eh paksa ai menukar nang hanyar lagi. Umpatkah,” sahut Ongol. “Umpat dong, siapa tahu bedapat binian bengkeng, wakakak,” ujar Anang Gabau. “Huh, dasar bujang lapuk. Kepasar tu nang dicari tu binian tu am,” sahut Acil Jablay. “Iya dong,” ujar Anang Gabau.

Kada berapa menit sampai jua bedua ne ketempat tujuan, sampai disana langsung ja menuju ke toko penjual kipas. “Cari apa Bang,” sahut penjual kipas nang bengaran Siti Asoy. “Cari kipas, adakah,” sahut Ongol. “Banyak Bang, ada harga seratusan sampai dua ribuan. Tinggal pilih ja pian,” ujar Siti Asoy menawarkan kipasnya. “Nang paling murah ja, nang dua ribuan,” sahut Ongol sambil meunjuk wan duit dua ribuan.

Handap kisah, sebelum bulik kerumah Ongol wan Anang Gabau singgah ke warung Acil Jablay imbah menukar kipas tu tadi. “Berapa Ngol harganya,” takon Acil Jablay. “Kawa menukar nang dua ribuan ja Cil ai,” sahut Ongol. “Kenapa kada nukar nang telarang dikit. Kawa jua telawas memakainya daripada nang murah,” ujar sidin. “Kada tapi ada duitnya lagi am Cil ai,” sahut Ongol pina membari maras banaran. “Coba ai dulu,” ujar Anang Gabau.

Lalu Ongol mengipas-ngipasi kipasnya, bebaya 5 kali kipas harau tepacul kipasnya. “Hah, kipas pacul walai,” ujar Anang Gabau. Melihat kipas tepacul baya 5 kali kipas harau habang muha Ongol. “Bah iya pang, kada asli,” ujar Ongol pina masam muha. “Bulik akan ngolai, rugi ikam dua ribu mun kipasnya rusak baluman lawas dipakai,” ujar Anang Gabau mengompori Ongol.

Apada, behancap Ongol tulak lagi ke pasar Kampung Liur didangani Anang Gabau. Kada berapa sampai am buhannya ke toko Siti Asoy. “Kaya apa ne, baya 5 kali kipas rusak am,” ujar Ongol pina telihat muha habang. Lalu Siti Asoy menjelaskan. “Mun harga lima ribuan tu kipasnya nangkaya ini ne. Mun nang dua ribuan kipasnya didiamkan kepalanya nang digelengkan sana sini,” ujar Siti Asoy.

Mendangar penjelasan Siti Asoy tadi, harau masam muha Ongol wan Anang Gabau, lalu bulik kada permisi lagi. “Bujur inya jua Ngolai, pantas ai 5 kali kipas rusak mun salah aturannya eh. Seharusnya kepala ikam nang bekipas sana sini lainan kipasnya nang dikipaskan sana sini, hahahaha,” ujar Anang Gabau mengayai Ongol. (fin)

Belajar naik pohon

Pina melihat nyaman ja Dangdut naik pohon nyiur sampai kepucuk lalu Ongol beniat handak belajar. Kada mudah pang belajar naik pohon nyiur tu mun asal naik ja apabila tesalah bisa-bisa behabang awak tupang turunnya karena tegisang pohonnya.

Demi kawan, Dangdut ne rela ja melajari asalkan syarat harus bisa dipenuhi. “Mun handak belajar naik pohon nyiur ne Ngolai ada syaratnya. Mun kawa memenuhi aku lajari ja,” ujar Dangdut. “Syaratnya apa gerang ai,” takon Ongol pina semangat bebanaran. “Ikam harus bisa memutik nyiur paling sedikit 5 buting,” ujar Dangdut. “Cehai, gampang ja tu ah. Jangankan 5 buting, 10 gin sanggup ja aku tu eh, hehehe,” sahut Ongol pina tamam ja lawan muha. Padahal, inya ne kada tahu paan ngalihnya mematah tangkai nyiur apalagi takena nang layat, tepaluh-paluh sampai kedalam-dalam tupang judulnya.

Handap kisah, sesuai perjanjian antara bedua ne lalu Dangdut melajari Ongol naik pohon nyiur. “Mula-mula ikam jajaki tak-tak nang ada tu lah. Begemet-gemet ja,” ujar Dangdut memadahi. “Hemmmm.... kaya itu ja sekalinyalah naik nyiur tu. Pantas ai pina hancap banaran ikam naiknya kada berapa menit sudah ada dipucuknya am,” garunum Ongol sambil unggut-unggut lawan dagu. “Kaya apa, paham ja kalolah,” takon Dangdut. “Sip walai, paham ja aku,” ujar Ongol sambil membujuri kupiah nang pina telihat miring lawan tapih nang telului.

Lalu Ongol menjajaki tak-tak nang ada dipohon nyiur wadah inya benaik tadi. Pina telihat menggatar pang batis neh. “Jangan tapi menggatar paan, kalo pina tesalah jajak,” kuriak Dangdut tumatan bawah. “Hati-hati Ngoooollll,” kuriak Anang Gabau. “Tenang ja waaallll,” sahut Ongol nang pina sudah tepaluh-paluh menaiki pohon nyiur tadi.

Bebaya tinggi 3 meter, harau sudah pucatam muha Ongol neh lalu handak turun am. “Asa kada kawa walai, menggatar batis lawan paluh pina kaya biju jagung ganalnya,” ujar Ongol tumatan atas pohon. “Lanjutkan ja, setumat lagi sampai am tu ah,” ujar Dangdut membari semangat wan Ongol. “Kada kawaaaaa,” ujar Ongol pina mengarasi.

Harau dasar bujur am, kada berapa menit lapas jajakan apada mendusur Ongol tumatan atas pohon. Kada berapa menit tujah pas ada diatas tanah. “Nah iya am, apa jar aku tadi, tegisang kalo,” ujar Dangdut pina geleng-geleng kepala.

Sekalinya Ongol rahatan tujah ne tapihnya tesingkai apada pisang belonjor kelihatan. “Hahahaha, pisang belonjornya umpat ju tegisang. Habang pulang,” ujar Anang Gabau behimat banaran ketawa. “Layu walai, hua hahaha,” ujar Dangdut umpat jua menambahi.

Kada berapa menit sadar am Ongol dari tujahnya tadi, sekalinya nang ditakoninya tu pisang belonjornya tu am. “Masih adakah pisang belonjor aku neh,” ujar Ongol pina meraba-raba. Melihat kelakuan Ongol tadi harau betambah behimat buhannya mengangkang. “Masih ada ja Ngolai, untung japang kada sangkut dipohon nyiur, hua hahahaha,” ujar Dangdut. Harau masam muha Ongol disambati bebuhannya. (fin)