Rambut Sapu Haduk

BIASANYA menyambut lebaran di Kampung Liur mengadakan gundul massal. Kada tahu jua tradisi ini ne sudah ada am. Haji Untat nang jadi sesepuh kampung gin kada tahu asal muasal gundul masal itu. “Kada ku paham jua Ngolai,” ujar sidin rahatan menjawab pertanyaan Ongol. “Maka pian sesepuh kampung Ji, kenapa pian kada tahu,” gasak Ongol. “Sudah aku padahkan kada tahu, menjotol ja ikam ne. mau neh,” ancam sidin.

Mendangar mau neh, harau hinip Ongol. Maksudnya mau neh dilului sidin tapih bila wani mengarasi. “Inggih Ji, jangan pian lului paan. Kada paan. Supan Ji ai,” sahut Ongol tepagat-pagat lawan pander.

Kekawalan Ongol ne sudaham digunduli sampai licin kepala dapatnya. Tetinggal Ongol sorangan ja nang belum dapat giliran. “Hanyar ini ja aku ne digundul, biasanya guntingan cepak pang,” garunum Ongol sambil memusut-musut lawan rambut.

Kada berapa lawas dikiyau Haji Nahap Ongol ne. “Ui Ngol, giliran ikam ne. lajui,” kuriak sidin. “Inggih Ji, lagi membujuri tapih telului nah,” sahut Ongol bejalan sambil membujuri lawan tapih.

Handap kisah, lawas jua pang Haji Nahap ne menggunduli kepala Ongol. “Akui lawasnya, bebaik beisi kajian Ongol ne,” tagur Anang Gabau. “Kayanya,” sahut Dangdut. “Handak setengah jaman sudah kada tuntung jua menggunduli seikung ne,” ujar Utuh Lengkor pina musti banar lawan pander.

Ketuhukannya dipanderi lalu Haji Nahap ne angkat bicara jua sidin. “Ikam handak tahulah kenapa lawas banar menggunduli rambut Ongol to,” takon sidin. “Pian gawiannya nangkaya bebinian,” sahut Dangdut pina musti banar lawan pander. “Hus, jangan kaya itu, kalo pina ketulahan muha ai,” tagur Anang Gabau. Apada masam muha Dangdut dapatnya.

Lalu Anang Gabau betakon. “Truss… kenapa Ji,” ujar Gabau mencoba merayu pas melihat muha Haji Nahap tadi telihat pina habang banar pas disambati Dangdut. “Anuah, anuah, rambut Ongol to karas nangkaya sapu haduk,” padah sidin.

Mendangar kisah sidin tadi, harau tebelalak mata bebuhannya. “Iyalah Ji, karas nangkaya sapu haduk,” ujar Utuh Lengkor setengah kada percaya. “Asa kada percaya Ji ai amun kada melihat,” sahut Dangdut pulang.

Lalu bebuhannya mendatangi Ongol nang duduk dikursi pina ngalih menggarakan kepala takut kalo pina rempang kulit dapatnya parang penabasan rumput. “Coba ikam datangi Ongol to Dut,” suruh Gabau. “Oche Boss,” sahut Dangdut sambil melenggangkan batis kearah Ongol.

Tilik sana tilik sini lalu membawa kabar kewadah bebuhannya. “Bujur Bosai, kaya sapu haduk memang,” ujar Dangdut membari kabar lawan Anang Gabau. “Mari kita lihat sama-sama bujur kada,” ujar Anang Gabau membawai bebuhannya mendatangi Ongol pulang.

Bebaya menjapai lawan rambut Ongol tadi. Harau lantang banar Anang Gabau bepander. “Bebuhan ikam ne kena bongoli Ongol. Ne kada rambut sapu haduk pang tapi handak enam bulanan kada keramas makanya karas,” kisah Anang Gabau.

Mendangar kisah Gabau tadi harau mengangkang bebuhannya. “Astagalah, sekalinya mandi kada keramas pantasai baunya kaya iwak karing ada jua, mirip lawan iwak wadi ada jua,” ujar Dangdut. Haji Nahap tadi harau masam muha sidin pas disambati Anang Gabau bahwa rambut Ongol to kada karas nangkaya sapu haduk pang tapi kelawasan kada bekeramas. (fin)

Teculit Uyah

TUNTUNG sholat tarawih Ongol ne tulak kewadah Anang Gabau, biasa santai sambil berokoan cap pekat maklum handak seharian kada kawa beroko amun beroko ketahuan pasti kada puasa. “Puasa ikam tadi Ngol,” Takon Anang Gabau. “Puasa dong,” sahut Ongol.

Lalu bedua ne duduk dipelataran rumah, kada berapa lawas mencongol Utuh Lengkor membawa kunjui bejarang. “Nah pas banar kawan kita satu ini,” ujar Anang Gabau memuji. “Mantap banar,” ujar Ongol menambahi. “Tapi walai, kunjui kada tapi hapuk,” sahut Lengkor. “Nang penting kunjui,” sahut Ongol pina tamam lawan muha.

Rahatan memakan kunjui tadi, kada berapa menit harau mati lampu sekampungan, apada habutai bebuhannya. Rupanya kada disengaja cobek sambal tepindah kehiga ngarannya kadap kada melihat paan Ongol lalu meculit. Kada berapa menit tekuriak sorangan. “Masiiiiin,” kuriak Ongol. “Kenapa Ngol,” takon Utuh Lengkor. “Teculit uyah banyak banaran,” ujar Ongol sambil meludah-ludah membuang rasa masin dimuntung.

Kada berapa menit datangai Anang Gabau membawa lampu tembok, bebaya melihat harau dasar bujuran handak separo uyah habis teculit Ongol. “Akui gancangnya memakan uyah,” sindir Anang Gabau. “Gancang apanyakah, tesalah culit walai,” sahut Utuh Lengkor.

Apada mengangkangai bebuhannya melihat muha Ongol telipat jadi angka 8 gara-gara meharit ilat kemasinan. “Makanya jangan benafsu banar paan amun makan to, disadangi Ngolai,” ujar Utuh Lengkor menasehati. “Muha ikam ah, sama ja,” sahut Ongol membela diri.

Harau kada mengaruan lagiam memakan kunjui bejarang gara-gara teculit uyah banyak banaran. Untung japang teculit uyah jakanya teculit Acil Jablay harau disasah sidin tupang lawan sesapu haduk. (fin)