Habut Cari Warung Makan

HARI semalam Ongol lawan Utuh Lengkor handak begawi tapi sebelumnya bedua ne bekeliling kampung handak becari umpan gasan beunjun.
Lawas buhannya ne bekeliling becari umpan tadi, lalu tedangar bunyi diparut Ongol, grek, grek, sekalinya bunyi cacing lagi benyanyi minta jatah makan. “Bunyi cacing ikam to Ngol, lakasiam kita makanan,” ujar Utuh Lengkor. “Warung mana kita makan,” sahut Ongol.
Lalu Utuh Lengkor ne menunjuk ke arah barat. “Biasanya amun aku Ngolai diwadah Acil Jablay tupang,” ujar Utuh Lengkor. “Tesarah ikam ja nang penting ada gasan mengganjal parut,” sahut Ongol pina musti banar.
Handap kisah, bebaya handak sampai kewarung Acil Jablay harau masam muha buhannya. “harau tutup Ngolai,” ujar Utuh Lengkor. “Nah hikamai, kemanaam kita,” takon Ongol. “Kita kewadah keluarganya Haji Untat, disana ada bejual nasi kuning segala,” ujar Utuh Lengkor.
Bebaya handak sampai harau masam pulang muha Ongol lawan Utuh Lengkor ne. “Nah tutup pulangam,” ujar Utuh Lengkor. “Waduhlah, hari apa gerang hari ne.” takon Ongol. “Hari Jumat Ngolai,” sahut Utuh Lengkor. “Dasar bujuram, biasanya bila hari Jumat to banyak nang kada bukanya warung,” ujar Ongol pina musti banar.
Merasa lapar, lalu buhannya ne beduduk dibatang banyu. “Waduh, kemana am kita ne Ngol, parut lapar banar, handak dimakan kedida,” keluh Utuh Lengkor. Nah, rupanya Ongol ne melihat ada bungkusan dibatang banyu, lalu turunai handak meambil bungkusan dari kestas nasi, bebaya dibuka harau tekuhuk-kuhuk Ongol ne. “Adapa Ngol,” takon Utuh Lengkor tumatan atas batang. “Acan bebungkus walai,” sahut Ongol.
Mendangar pander Ongol ne harau masam muha Utuh Lengkor. “Dasar sial kita hari ne Ngolai, sudah warung nang diharap-harap tutup semuanya, ditambah pulang dibongoli orang acan dibungkus lawan kertas nasi,” ujar Utuh Lengkor tesandar ditihang listrik.
Kada seberapa lawas burung dara lewat diatas kepala Lengkor harau diheranya Lengkor ne. “Hau apa ne, pina lenyak diatas kepala,” garunum Lengkor, bebaya menculit lawan mencium nang lenyak tadi harau tekuriak. “Tahi burung sialaaaann,” kuriak Utuh Lengkor. (fin)

Kisah Kampung Katulahan

HARI semalam di Kampung Liur ribut banar, angin betiup kencang banar sampai lampu PLN gin hidup segan mati kada hakon pokoknya ngeri banar. "Nangkaya kena kutukan ja kampung ne, sudah mati lampu sekampungan ditambah pulang lawan hujan deras banar," ujar Ongol mengisahi Utuh Lengkor. "Bujurlah Ngol, aku semalam kada merasakan paan," sahut Utuh Lengkor. "Kada merasakanai amun muha ikam guring melengkor," ujar Ongol, apada masamai muha Lengkor dapatnya.
Rupanya nang mengalami kejadian semalam to kada Ongol ja, Dangdut gin sama, maka kisah Dangdut ne lebih ngeri lagi. "Harau rahatan handak bulik kerumah aku semalam to walai, melihat langit hirang banar rahatan aku melihat lampu jalanan to hidup mati hidup mati tuam, pokoknya nangkaya kampung kita ne katulahan," kisah Dangdut, apada Lengkor mendangar kisah buhannya bedua ne tenganga mutung.
Kada seberapa lawas datangai Haji Untat. "Adapa ne buhan ikam pina nahap banar bekisah," takon sidin. "Anuah Ji, Ongol lawan Dangdut ne bekisah kampung kita ne katulahan," ujar Utuh Lengkor. "Hau bujurkah to," sahut sidin tekajut-kajut.
Handap kisah, lalu Ongol lawan Dangdut mengikisahkan tumatan awal pulang. "Hmm boleh jadi jar buhan ikam to, jadi kita ne harus banyak beibadah," ujar sidin pina musti banar. "Nah bujur to Ji ai," sahut Ongol pina musti banar jua.
Rupanya kisah Ongol lawan Dangdut ne sampai jua ketelinga Anang Gabau. "Amun kaya itu, kita sekampungan betaubat, sebelum bala dari Tuhan datang," ujar Anang Gabau. "Itu sudah jadi peringatan bahwa nang bekuasa to Tuhan lain manusia," ujar Haji Untat menambahi.
Keisukan harinya harau hibak di Mesjid buhannya, ada nang sholat, ada nang aur bekisah ja. "Hau bebila buhan ikam ne sholatnya," tagur Haji Lului. "Pengantutan Ji ai," sahut Anang Gabau. "Ooo, pantasai rahatan kami sholat tadi ada bau kantut, rupanya kantut ikamlah maka bau hantalu buruk pulang," ujar sidin pulang.
mendangar kisah sidin ne harau masam muha Anang Gabau. "Lain kali kalo handak bekantut jangan didalam Mesjid, baunya handak semesjidan nang mencium," ujar sidin menasehati. Harau betambah seraba salah Anang Gabau dapat, apada bulik membawa supan akhirnya. (fin)

Pakai Tolak Angin

KAMPUNG Liur belum lawas ini dihantam angin puting beliung nang handak semua rumah rata lawan tanah temasuk rumah ampun Haji Untat nang megahnya mirip lawan istana ratu balqis di zaman kenabian Sulaiman lawan ampun Haji Lului gin handak sama jua hancur terberai sampai jamban sidin teangkat keatas.
Sekalinya diantara rumah nang hancur di Kampung Liur tedapat satu rumah nang kada hancur jangan hancur miring ja gin kedida sama sekali. “Hau rumah sapa nang masih tegar bediri to,” takon Haji Untat. “Kada tahu paan ulun,” sahut Haji Lului.
Merasa penasaran lalu bedua nang pernah mengunjungi kota mekkah ini mendatangi rumah nang masih berdiri kokoh. “Amun kada salah to Ji ai, rumah ampun Ongol pang,” ujar Haji Untat. “Harau kada salah lagiam Ji, apa kajian Ongol to bisa rumah inya kada hancur takena angin puting beliung nang ganas dan dasyat to,” ujar Haji Lului pina musti banar.
Handap kisah, lalu buhannya mengetok lawang. “Assalamu alaikum,” ujar Haji Untat. “Wa’alaikum salam,” sahut Ongol .”Oh, buhan piankah, masuk ah,” suruh Ongol sambil menyuruh lawan Galuh Lintak minta diulahkan banyu kopi gasan tamu terhormat ini.
Tuntung disurungi lawan banyu kopi tadi lalu Haji Untat ne betakon. “Apa kajian ikam ne Ngol, rumah buhan kami hancur temasuk rumah Acil Jablay segala, sedangkan ampun ikam ne kada begarak sedikit pun dihantam angin puting beliung,” takon Haji Untat sambil menggatar bibir sekalinya kedinginan.
Mendangar takonan Haji Untat ne, Ongol langsung menunjuk ketihang rumah. “Itu nah rahasianya,” ujar Ongol. “Apa to Ngol,” takon sidin pina penasaran banar. “Tolak angin,” sahut Ongol.
Mendangar pander Ongol ne harau masam muha Haji ne. “Harau asa kada masuk diakal, tapi kalo ditelusuri dengan ngarannya to tadi dasar bujuran pang,” ujar Haji Lului. “Iih Ji ai, ngarannya ja gin tolak angin, jadi angin nang datang ditolak,” ujar Haji Untat pulang pina musti. “Tapi kalo angin nang keluar dari tumatan lubang bawah tupang kawa kada ditolak,” takon Haji Untat pulang. “Nah hikamai, kalo itu ditolak rahatan handak keluar bisa ganal nangkaya orang betianan tupang judulnya, gambung parut,” sahut Haji Lului sambil mengangkangan ketawaan buhannya. (fin)

Tepicik Biji Rudal

TUNTUNG meadakan pesta besar-besaran di Masjid Jami Kampung Liur, Ongol ne nangkaya orang ke hilangan energi bebaya ja, bulik sampai kerumah rahatan handak masuk kedalam tehantup lawang sampai nyaring banar bunyinya.
Melihat laki pina kada semangat hidup lalu bini Ongol nang bengaran Galuh Lintak ne mengiyau tukang urut. “Bang, malam ne pian baurut jalah,” takon bini. “Tesarah ikam ja dingai, nang penting aku besok kawa begawi,” sahut Ongol apa adanya.
Handap kisah, kada seberapa lawas datangai si tukang urut ne tadi. “Assalamu alaikum,” ujar si tukang urut. “Wa’alaikum salam,” sahut Lintak. “Eh, piankah, masuk, Abang Ongol sudah lawasan mehadangi pian didalam kamar,” ujar Lintak.
Sebelum diurut si tukang urut ne meminta disiapkan bawang putih lawan bawang habang gasan pelicin awak supaya kada tekuyak kulit awak. “Siapkan apa jar aku tadilah,” ujar si tukang urut ne. “Inggih,” sahut Lintak singkat.
Lalu si tukang urut ne mulai memijat, nang pertama dibatis, lalu dilintuhut, lalu naik lagi. “Akai, akaiii, akai, akai,” kuriak Ongol ne rahatan dipijat di atas lintuhut ne tadi maklum kada biasa diurut. “Tahan jalah ne kada gancang paan Ngolai,” ujar si tukang urut membisai Ongol. “Kada sakit apanya kah,” sahut Ongol. “Ikam ne masuk angin Ngolai,” ujar sidin pulang.
Nah ratahan memijat diatas paha ne si tukang urut tepijat didaerah rawan. “Nah, ini ne biji anginnya, maka ganal pulang,” ujar sidin. Rahatan dipicik sidin harau tekuriak pulang Ongol ne. “Lain bijinya to, itu biji rudaaaaal,” kuriak Ongol. Rupanya si tukang urut ne kada mendangar paan alias tetulian. “Lain apanyakah, ini ne am biji anginnya to,” ujar sidin pulang mengarasi.
Rupanya rahatan dipicik behimat, harau tujah Ongol ne. “Nah, tuntungam, Ongolnya sudah kada begarak lagiam,” ujar sidin. “Kenapa kada begarak lagiam,” takon Lintak. “Biji anginnya sudah hilangam,” sahut sidin. “Biji anginnya nang mana,” takon Lintak pulang. “Itu diantara selangkangan paha,” ujar sidin sambil menunjukan.
Melihat apa nang ditunjukan sidin tadi, harau tekuriak Galuh Lintak. “Itu lain biji angin paan, itu gasan menyamankan ulun pian picik, pantasai laki ulun siup,” ujar Lintak. Mendangar kuriakan Lintak nangkaya halilintar harau tekelipik si tukang urut ne tadi. “Hah, berarti aku tadi tesalah piciklah, pantasai pina kenyal-kenyal,” sahut sidin.
Rupanya si tukang urut ne sekalinya matanya buta, kada tahu paan nang mana biji rudal lawan biji angin. Apada harau habut Galuh Lintak didalam rumah, Ongol ne handak seharian meharit kesakitan, untung japang kada pecah biji rudal to jakanya pecah harau ngalih tupang mencari pengantinya. (fin)

Kena Hukuman

SIANG to tumbur banar di rumah Ongol, anaknya nang bengaran Utuh Lantui mendadak bulik menangis tapi kada tapi tahu paan sebabnya timbul menangis menggeraung limbah datang ke rumah. “Hau nak, napa ikam datang kerumah timbul menangis ja,” takon Ongol. “Maka ikam ne sudah abah bayarkanam SPP lawan duit komite sekolah,” takon Ongol pulang.
Nang ngarannya kekanakan ne kada mau paan behinip bila kada ditukarkan pentol. Owee, oweeee, bunyi tangis Utuh Lantui pina benyaring, mendangar tangisan anak lalu Ongol cinik memikirnya. “Ikam ne kada bepadah sapa nang meanu ikam to,” takon Ongol pina handak besesarekam lawan anak.
Limbah ditukarkan pentol akhirnya Utuh Lantui ne behinip jua lawan kada bepander tapi kada tapi lancar paan maklum japang kekanakan. “Ulun to bahai, dijinjit ditelinga oleh Haji Utai,” ujar Utuh Lantui ne bebaya ja kada menyambat. Mendangar pander anak ne harau sarek banar Ongol. “Dasar Haji kada tahu diadat, kekanakan ja dilawani, awas pian,” ujar Ongol pina nahap banar sampai membawa sesapu haduk.
Handap kisah, kada seberapa lawas sampai jua akhirnya Ongol kerumah Haji Untat. “Assalamu ‘alaikum,” ujar Ongol. “Wa’alaikum Salam,” sahut Haji Untat tumatan dalam rumah. “Hau adapa ne pina tehengap-hengap pehinakan datang kerumah ku ne maka membawa sesapu haduk pulang,” takon Haji Untat. “Anuah Ji, anuah Ji,” sahut Ongol pina ngalih banar bepander. “Ooo.. handak membersihkan halaman ku kah, ayu ja mumpung hibak lawan ratik to, gampang ja masalah bayaran,” ujar sidin. Mendangar pander sidin ne harau supan ganal Ongol lalu kada banyak bebunyi lagiam. “Hau ayuam, bebila lagiam handak begawi,” gasak Haji Untat.
Merasa digasak sidin ne harau beucap jua akhirnya Ongol. “Kedatangan ulun kesini ne Ji ai, handak menakoni anak ulun to menangis dijinjit pian jarnya,” ujar Ongol. “Hmm pahamam aku, tahulah anak ikam to menawak aku lawan kunjui karas makanya aku jinjit telinganya,” padah Haji Untat sambil menampaikan bincul didahi gara-gara ditawak lawan kunjui goreng nang karas tadi.
Mendangar kisah sidin ne harau tehinip Ongol. “Nah kebelujuran ikam ne ada dirumah aku, ikamam nang mengantikan hukumannya,” ujar sidin pulang. Apada Ongol mendangar ujar sidin tadi mau kada mau menyapu halaman rumah sampai bersih. Limbah tuntung membersihkan lalu bulik sambil mengarunum sorangan. “Ini ne gara-gara anak jua kada kawa diatur, habis nang tuha keburukannya,” garunum Ongol sambil mencatok-catokan sesapu haduk kepot bunga.
Rupanya tecatok pot bunga ampun Acil Jablay apada tumburai sidin dapatnya “Ui, ganti ikam Ngolai, pot bunga ampun ku to rusak,” kuriak sidin rahatan kebelujuran melihat Ongol asik mencatoki bunga ampun sidin, mendangar kuriakan sidin ne harau behancap bukah Ongol kada meingat diri lagiam, amun cagaran dapat hukuman menyapu halaman pulang lebih baik bukah langkah seribu. (fin)

Ilmu Ikhlas

HARI semalam Ongol lawan Anang Gabau tulak ke Kota Samuda handak baelang wadah Acil Kelilu. Biasa, nang ngarannya kota Samuda terkenal lawan buah nyiurnya. Maka bila habis bulik tumatan sana to pasti membawa oleh-oleh paling kada buah nyiur to enam biji.
Tuntung baelang handak melima jaman buhannya disana, kada tahu jua apa nang dikisahkan nang penting bulik membawa buah nyiur. “Kawa ja kalo motor buhan ikam membawa enam biji buah nyiur ne,” takon Acil Kelilu. “Kawa ja Cilai,” sahut Ongol sambil siap-siap handak tulakam. “Inggih Cil, terimakasihlah,” ujar Anang Gabau. “Iih, jangan jaralah, bila ke Samuda baelang pulanglah,” sahut sidin sambil melambaikan tangan rahatan buhannya bulik.
Handak kisah, dalam perjalanan bulik, rupanya buhan Ongol lawan Anang Gabau ne bedapat lawan Utuh Lengkor. “Halo lew, handak kemanaan buhan ikam, singgah pang dulu kerumah,” kuriak Utuh Lengkor rahatan menyapa buhannya. “Datang Samuda walai,” sahut Ongol. “Singgah dulu kerumah,” ujar Utuh Lengkor.
Lalu buhannya singgahan kerumah Utuh Lengkor. “Nah pas banar tu walai buhan ikam membawa buah nyiur,” ujar Utuh Lengkor. “Gasan dibawa bulik kerumah,” sahut Ongol. “Siang ne panas banar walai, nyaman jua kita minum banyu nyiur to,” rayu Utuh Lengkor. “Nah hikamai, kada kawa walai takut kemalaman bulik kerumah, ikam ambil sebiji gasan diminum,” ujar Anang Gabau. “Ikhlas kada ne,” takon Utuh Lengkor. “Ikhlas walai, kita ne sudah mengaji ilmu Ikhlas,” sahut Ongol pina musti banar.
Tuntung diwadah Utuh Lengkor, bebaya sepuluh meter bedapat pulang lawan Haji Untat. “Datang manaan buhan ikam pina banyak membawa buah nyiur,” takon sidin. “Datang Samuda Ji ai,” sahut Ongol. “Minta pang sebiji,” ujar sidin. “Ambil ja Ji ai,” sahut Anang Gabau. “Ikhlas kada buhan ikam,” takon sidin pulang. “Ikhlas ja Ji ai,” sahut Ongol.
Rupanya handak meenam orang nang meminta buah nyiur tadi, apada buah nyiur nang dibawa tumatan Samuda tadi habis tetinggal tangkai buahnya ja. Masamai muha buhannya. “Iyaam, kebanyakan beisi kawan ne ada nang nyaman ada nang ngalih, kada dibari kawan, handak dibari kita membawa sedikit ja, mau kada mauai ini ne am nang ngarannya mengaji ilmu ikhlas to,” kisah Ongol. “Mudah-mudahan kita dapat pahala nang ganal dari Tuhan,” sahut Anang Gabau sambil buhannya menadahkan tangan keatas tanda syukur sudah berbuat baik hari itu. (fin)

Tetawak Muha Acil Jablay

HARI semalam di Kampung Liur sudah dimulai pemilihan pembakal kampung. Sore to buhannya nang menjadi calon sudah bekumpul di tangah kampung sampai kada ingat lagiam lawan menyembah Tuhan. Amun bekumpulnya sebelum salat juhur, tulaknya handak parak salat Asyar sampai sanja hanyar tuntung bekeliling kampung.
Haji Untat lawan Haji Lului pina habut banar, sampai tepaluh-paluh meatur anak buah. “Ayo lakasiam, bebuat di mobil kita tulakan jangan kada ingat membawa mekropon,” ujar Haji Untat pina kalang kabut, sekalinya anak buah sidin ne Ongol lawan Anang Gabau.
Haji Lului gin sama ja, sidin betambah habut jua meatur anak buah nang bengaran Utuh Lengkor lawan Utuh Kalubut ditambah lawan Dangdut. “Ayo lakasi, bawa salon nang ganal tuam gasan kita bepander supaya tedangar masyarakat,” ujar sidin ne rahatan menyapu paluh diawak, maka bebau masam pulang awak sidin ne maklum handak melima hari kada mandi.
Handap kisah, rahatan bejalan mengelilingi kampung pas kebelujuran dihadapan warung Acil Jablay. “Cil sambut ne, gambar Haji Untat nang cagaran menjadi calon pembakal kampung,” kuriak Ongol. Sekalinya Ongol ne menimbai pas takena muha sidin, apada tekuriakai sidin “Akaiyah, kena ikam Ngolai,” ujar Acil Jablay menyumpahi.
Kada seberapa lawas lewatai Haji Lului. “Cil, sambut gambar Haji Lului, kena bila mencontreng gambar sidin jalah,” kuriak Dangdut. Sekalinya sial pulang Acil Jablay ne takena tawakan Dangdut jua. “Kurang ajar banar buhan ikam ne lah, nang tuha dipermainkan,” kuriak sidin sambil menyasah mobil Haji Lului.
Merasa disasahi Acil Jablay, apada behimatai mengebut Haji Lului ne. “Lajui Ji, Acil Jablay buhan kita,” padah Utuh Lengkor. Kada seberapa lawas telewati mobil ampun Haji Untat. “Hau napa mendahului, kada boleh,” kuriak Ongol. “Acil Jablay menyasah lawan sesapu haduk handak mencatok,” sahut Utuh Kalubut nang rahatan beduduk dibelakang. Mendangar sahutan Utuh Kalubut harau mengebut jua Haji Untat. “Harau bujuram Ji ai,” padah Anang Gabau.
Akhirnya bekeliling kampung batal gara-gara Acil Jablay mehamuk amun aur tetawak kartu gambar pembakal. “Inilah nang ngarannya calon pembakal, lawan warga ja pina kasar nangkaya apa amun duduk jadi pembakal bisa-bisa mencatok lawan kayu,” garunum Acil Jablay rahatan keuyuhan menyasah mobil buhannya nang mengebut kada meingat diri. (fin)

Untat Basesengot

HARI semalam ada kejadian nang mehebohkan, Haji Untat sempat mehamuk gara-gara gambar sidin nang diandak disimpang Kampung Liur di bari sesengot padahal sidin to kada besesengot paan tapi bejangkut panjang.
Lalu meumumkan bagi nang mendapatkan orangnya nang meolah sidin besesengot to dapat hadiah sapi seikung lawan ayam satu kandang. “Kada nang tuha ja, nang anum bila mendapatkan orangnya dapat hadiah,” ujar sidin rahatan ada di aula Kampung Liur.
Mendangar pander sidin ne harau behimat buhannya becari. “Cari kemana yu kita,” takon Ongol. “Ngalih Ngolai, manusia di kampur liur banyak kada sembarangan pang kita menuduh,” sahut Anang Gabau.
Handap kisah, rupanya nang dipadahkan Haji Untat ne sudah menyebar luas di Kampung Liur lalu jadi bahan pemanderan buhannya. “Teliur jua hadiah nang dibarikan sidin to,” ujar Acil Kelilu. “Paling dikaramputi sidin ja, kada mungkin sidin to hakon membari sapi seikung lawan ayam sekandangan,” sahut Siti Asoy. “Bujur ja ikam to Soy-ai, coba ikam pikir sapi sidin beisi seikung ja ayam satu kandang ja, kalo dibarikan sidin semuanya nangkaya apa am hidup,” ujar Acil Kelilu. “Harau bujur ja pina Cilai, dimana pian dapat ide nangkaya itu,” takon Acil Jablay, “Semalam belajar dipeternakan,” sahut Acil Kelilu. Lalu buhannya mengangkangan ketawaan.
Dirumah Ongol, “Bah ulun semalam meolah sesengot digambar nang ada disimpang jalan sana to,” ujar Utuh Lantui sambil menunjuk keluar jendela, mendangar suara dari anak ne harau habang muha Ongol. “Hau, ikamlah nak nang mencoret gambar Haji Untat to,” takon Ongol. “Inggih bahai, amun sidin to bejanggut japang, tapi kada besesengot kayanya kada bagus,” sahut Lantui, mendangar sahut anak ne harau serba salah Ongol. “Nah ikam ne meolah gawian ja nakai,” ujar Ongol. “Tahu kada ikam, nang meolah sesengot digambar to wayah ne dicari orang,” padah Ongol, mendangar pander abahnya ne harau menangis Lantui.
Kada seberapa lawas datangai bini Ongol. “Adapa bah, anak pulang nang ditangisi kedida gawian lagiakah pian to aur anak ja diajaki,” ujar Galuh Lintak. “Kada nangkaya itu pang ma-ai, wayah ne Haji Untat mengumumkan sapa nang mendapatkan orang nang meolah gambar sidin besesengot to dibari hadiah,” padah Ongol. “Nah bagus to, kaya jua setahun kada menukar iwak,” sahut Lintak. “Ikam tahulah, anak kita ne am nang meolah gambar Haji Untat besesengot,” padah Ongol, mendangar pander Ongol ne harau habut Lintak
Rupanya tumbur bedua laki bini ne tedangar Haji Untat nang lewat. “Adapa ne pina tumbur bedua laki bini,” takon Haji Untat. “Anuah Ji, nang meolah sesengot gambar pian to anak ulun ne am,” padah Ongol, mendangar pander Ongol ne harau tekajut sidin. “Hau bujurlah to,” gasak Haji Untat. “Inggih Ji ai,” sahut Ongol. “Mana anak ikam suruh keluar,” ujar Haji Untat.
Kada seberapa lawas keluarai Utuh Lantui. “Ikamkah nak nang meolah aku besesengot,” takon sidin, “Inggih,” sahut Lantui, “Kada papa paan nakai, setelah aku pikir-pikir sekalinya betambah gagah pang kelihatan besesengot,” ujar sidin sambil melihatkan janggut sidin nang hanyar dilarap lawan parang pehumaan.
Melihat tingkah nang tuha ne apada Ongol lawan bininya mengangkangan ketawaan, dikira buhannya Haji Untat ne sarekam sekalinya kada paan, “Terimakasih nakai, ikam meubah penampilan aku,” ujar sidin sambil membari sabuting coklat gasan Lantui. (fin)

Dapat Iwak Bebaju

HARI minggu semalam buhan Ongol ne tulakan beunjunan ke kampung subarang, nang ngarannya handak beunjun ne, pastian membawa wadah gasan meandak iwak bila dapat banyak. Ada nang membawa wadah iwak khusus ganal pulang nangkaya boks, amun Ongol ne kada paan buhannya membawa karung gabang ja, tapi kalau dibandingkan lawan bok tadi bisa tebanyak pang iwaknya nang muat didalam karung gabang tadi.
Nang tulakan ne tadi, Ongol, Utuh Lengkor. Dangdut, Utuh Kalubut, Anang Gabau kada ketinggalan si tuha bejangkut putih Haji Untat. “Ji, memakai pentaran unjun apa am pian ne,” takon Ongol pina musti banar betakon lawan nang tuha. “Pentaran dari pohon salak ja Ngolai, kada tapi beduit ne,” sahut sidin. “Sama ai lawan ulun, tapi ampun ulun ne Ji ai berajah,” ujar Ongol. “Hau pina berajah segala,” takon sidin pina penasaran banar. “Berajah musti,” padah Ongol, apada buhannya mengangkangan ketawaan.
Handap kisah, lalu buhannya tulakan ke keloa jar habar ne disituam wadah peunjunan nang rami banar. Maka buhannya tulakan memakaimobil ampun Haji Untat nang dikenal lawan sebutan si raja juhung, maklum bebaya satu kilu jaraknya sudah mogokam.
Kada seberapa lawas sampaiam buhannya ketempat tujuan tadi, merasa harinya sudah malam mau kada mauai bemalam semalamam diwadah Acil Kelilu. “Umpat bemalamlah semalaman,” padah Ongol. “Ayu ja, amun kawa menahan serangan,” sahut Acil Kelilu. “Menahan serangan apa Cil, maksud pian to,” takon Ongol pina penasaran banar. “Serangan nyamuk ah, disini ne padang nyamuk,” ujar sidin pina musti banar.
Maka pas rahatan handak guring, harau bunyi nyamuk ne nangkaya orang handak perang dunia kelima ja. Ngeng, ngooong, ngeeeeeng, bunyi suara sayap nyamuk ne tadi. Pak, plepak, pak pak pak, bunyi tapih rahatan nyamuk ditapak. “Harau dasar sarang nyamuk disini,” garunum Ongol. Apada semalam Ongol kada karuan guring sampai mata bangkak nangkaya orang betimbil. Amun Haji Untat lawan Anang Gabau tenyaman ja guring tapi mengorok sampai teliur-liur.
Keisukan harinya tulakanam buhannya ne tadi, ada nang membawa bok iwak lawan pentaran unjun nang panjang nangkaya penjuluk kelayangan, ada nang membawa drum plastik gasan wadah iwak, masalah wadah iwak ne kada usah ditanya lagiam pokoknya ganal pada iwaknya lagiam.
Kada seberapa lawas sampai jua buhannya dilokasi peunjunan ne tadi. Maka umpannya gin lain dari biasanya, umpan wadai gaben bila kada dapat iwak, wadai gaben tuam dihantup. “Bawa berapa buting wadai gaben ikam Ngol,” takon Haji Untat. “Seplastikan Ji ai,” sahut Ongol. “Kawa ja kalo bebagi kena,” takon sidin pulang. “Kawa ja,” sahut Ongol sambil memasang umpan.
Sudah handak tangah hariam waktunya tapi kedida nang dapatnya jua lawan iwak nang diharapkan tadi maka panas banar pulang harinya. “Sudah haus, iwak kada dapat pulang,” ujar Haji Untat bemamai sorangan. Rahatan bemamai sekalinya tali unjun ampun sidin ada nang menariknya. “Nah, dapat ganalam ne,” garunum sidin.
Rahatan menarik tali unjun tadi sidin ne bekuriak memadahkan dapat iwak ganal. “Uiii, coba buhan ikam kesinian, aku dapat iwak ganal nah,” ujar sidin. Mendangar kuriak sidin ne tadi harau behancap buhannya mendatangi sidin. “Tarik begamit Ji, kena lepas iwaknya,” ujar Ongol pina nahap banar.
Kada seberapa lawas, bebaya sampai diatas unjun ne tadi, harau tekajut buhannya, lainan iwak paan nang didapat sekalinya baju panjang. Apada buhannya mengangkang ketawaan. “Pina nahap banar japang tadi lawan juhutan sekalinya baju bakas orang begawi, maka ada tulisannya pulang, Anda Belum Beruntung,” ujar Anang Gabau.
Mendangar kisah Anang Gabau ne harau mengangkangan buhannya ketawaan, sampai handak malam harinya kedida paan seikung-ikung nang dapatnya. Bebaya sampai kerumah masing-masing harau dimamai bini. “Sudah dua hari kada guring dirumah, sampai kerumah kada membawa iwak seikung-ikung,” ujar Galuh Lintak memamai Ongol. Apada Ongol masamai dapatnya. (fin)