Gaya di TV

KALUT banar pikiran buhan Ongol wayah ini ne, maka tingkah laku kada kawa ditagur lagiam, maklum tekanan ekonomi bahwa harga pekat lawan gatah kada naik. “Ngangur lagi, ngangur lagi, gara-gara gatah kada naik,” ujar Ongol benyanyi dihadapan buhan Anang Gabau rahatan buhannya bedudukan dibatang banyu.
Rahatan bedudukan lewatai penjual es lilin. “Es liliiiii, lilin es seribuaaaan,” kuriak nang bejualan es lilis. “Hah, ada orang bejual es lilin Ngol,” ujar Utuh Lengkor. “Kiyaulah,” takon Ongol. “Kiyau ja,” sahut Lengkor. “Es, kesini ikam,” ujar Ongol mengiyau penjual es lilin tadi.
Handap kisah, tuntung memakan es lilin handak sepuluh cucuk, maklum rahatan bedudukan tadi rupanya haus banar. “Berapa secucuk ne Ding,” takon Ongol. “Seribuan Bangai,” sahut penjual. “Akui larangnya, maka biasanya lima ratusan ja,” sahut Ongol. “Itu to tahun 2000-an Bangai, sekarang ne tahun 2009 jadi harga to naik,” padah penjual.
Lalu Ongol betakon. “Ngaran ikam siapa,” takon Ongol. “Ngaran ulun to Asoy,” sahut penjual es tadi. “Ngaran kurang beruntung,” ujar Ongol pina nahap banar lawan pander. “Kenapa Bang,” takon penjual nang bengaran Asoy. “Ikam ne memang cocok jadi penjual es lilin ja daripada pengusaha sarang walet,” ujar Ongol pina tamam ja lawan pander.
Mendangar kisah Ongol ne harau mengikik ketawaan buhannya. “Disadangiam Ngol, umpat-umpatan jua meniru gaya di TV,” kuriak Dangdut. “Itu to bujurlah Bang,” takon Asoy penjual es. “Iih, ne bujuran, buktinya ja ikam bejualan es lilin,” ujar Ongol. “Anuah Bang, ulun to sebenarnya kada bejualan es lilin paan, tapi ulun ne pengusaha kayu nang lagi bangkut, tapi kayu ulun to lain ilegal logging paan, tapi hasil buhan ulun menyelam disungai alias kada tepakai lagiam, lalu buhan ulun ulah jadi kayu,” kisah Asoy penjual es tadi.
Mendangar kisah Asoy to tadi, harau ampih mengikik buhannya. “Hau kenapa bisa kaya itu kisahnya,” takon Anang Gabau. “Iyaam Bangai, oknum di kota kita ne minta jatah sebulan to Rp5 juta makanya sampai bangkrut ulun ne,” ujar Asoy.
Apada masam muha buhan Ongol. “Kalo kaya itu to ngarannya pemerasan terhadap rakyat harus diberantas sampai keputing,” kuriak Ongol. “Hus, besabar wal, ne hanya kisah ja,” ujar Anang Gabau. “Tapi jangan lupa, bayar es lilin nang ikam hantup tadi,” ujar Dangdut. “Nah hikamai, kada beduit walai,” sahut Ongol. “Pokoknya pian harus bayar Bangai,” ujar Asoy. Apada mau kada mau tegadai tapih lawan Anang Gabau gasan membayar es lilin sepuluh cucuk tadi dimakan. (fin)