Audisi

KAMPUNG Liur meadakan audisi bintang radio, jadi ketuanya Haji Untat tapi dikritik bebuhan kampung. “Bagi pemenang akan dikirim ke kuala licak mengikuti kegiatan berikutnya,” ujar sidin rahatan ditakoni Anang Gabau lawan Ongol.

Mendangar cagaran ke kuala licak lalu bebuhannya handak umpatan. “Kita umpatan yu,” ujar Anang Gabau. “Ayo, tapi kekawalan nang lainnya pang, gimana dong,” sahut Ongol. “Gampang ja, kita bedua dulu nang mendaftar habis itu hanyar kita padahkan lawan kekawalan lainnya, gitu Ngol,” ujar Anang Gabau. “Kada paan, kita kompromi dulu lawan bebuhannya,” sahut Ongol pina mantap lawan sahutan tadi.

Handap kisah, berita penerimaan audisi bintang radio Kampung Liur sudah menyebar luas, dari nang kekanakan sampai kada begigi lagi gin tahu. Tapi banyak nang kada mendukung. “Kelakuan Haji Untat to kada pantas ditiru, masa sesepuh kampung gawiannya meadakan audisi seharusnya meurus kampung dong,” ujar Haji Lului pina menyindir lawan gawian Haji Untat.

Pernyataan Haji Lului ne didangar oleh bebuhan Ongol. “Kita pikirkan, kenapa sesepuh kampung gawiannya meurus audisi,” takon Ongol membuka pemanderan rahatan bedudukan dibatang banyu. “Harau iih walai, seharusnya meurus kampung, pantasai di kampung kita ne sidin kada kawa meatasi lahan terbakar amun pikiran sidin mencari keuntungan semata. Lalu kada tetahu paan lawan keadaan kampung,” kisah Anang Gabau.

Kada berapa lawas, lalu bebuhannya sepakat supaya jangan ada nang handak umpat audisi. “Kita larang bebuhan kampung supaya jangan ada nang umpatnya, biar akan sidin sorang ja meurusnya,” ujar Anang Gabau. “Amun ada nang umpat pang kaya apa,” takon Ongol. “Kita padahkan, bebuhan kampung kada mendukung, kaya itu ja beres,” sahut Anang Gabau.

Merasa kedida nang hakonnya umpat audisi bintang radio Kampung Liur, lalu Haji Untat cinik jua memikirkannya. “Hau ada apa ne, seikung-ikung kedida nang hakon umpatnya, ada apa gerangai,” garunum sidin sambil mejuhut kupiah handak turun tumatan rumah menuju kebatang banyu wadah biasa bebuhan Ongol bedudukan.

Kada berapa lawas sampai jua kewadah tujuan. “Kenapa bebuhan ikam kedida nang handak umpat audisi,” takon sidin. “Kada rami Ji ai,” sahut Anang Gabau pina musti lawan pander. “Kenapa,” takon sidin penasaran. “Kada menjamin masa depan ai, lebih baik begawi nyata daripada masih diangan-angan,” sahut Ongol menambahi.

Lalu sidin melamahi lawan pander. “Aku handak betakon jujur lawan bebuhan ikam, kenapa kedida nang hakonnya umpat audisi,” ujar sidin sambil menyurung lawan roko cap pekat supaya nyaman bepandar neh. “Bebuhan kampung to Ji ai kedida nang hakonnya mendukung lawan gawian pian to, masalahnya audisi to pian perjuangkan behimat banar sementara tugas utama pian sebagai sesepuh kampung to kada jalan. Lebih baik mundur ja pian,” ujar Ongol pina lantang banar bepander.

Mendangar pander Ongol tadi, harau telihat masam muha Haji Untat. “Ikam jar siapa,” takon sidin. “Kada usah betakon lagiam pian tuah, intropeksi diri pang. Tugas pian sebujurnya to kaya apa, amun kada sanggup jadi sesepuh kampung, Anang Gabau ne sanggup ja,” ujar Ongol sambil menunjuk ke Anang Gabau.

Merasa umpat dilibatkan jua harau habang muha Anang Gabau. “Muha tamam, aku kelimbahannya,” ujar Anang Gabau. Mendangar ceramah Ongol tadi harau bulik menjoor Haji Untat kada tetahu lagiam lawan muha. Melihat sidin bulik membawa muha masam harau diketawai bebuhannya. “Hua ha ha ha. Makanya jadi sesepuh kampung to harus bujur-bujur memperhatikan nasib warganya. Ne kada, handak memperkaya diri pribadi ja melulu. Kaya apa handak berkembang kampung amun sesepuh kampung ja kada tetahu lawan warga. Apa kata dunia,” kisah Ongol sambil mehisap roko cap pekat. (fin)

Dinding Rabah

HARI semalam bebuhan Ongol menyaksikan kegiatan di halaman Kampung Liur. Kegiatan itu sudah rutinam diadakan tiap tahun yakni meadakan rebana sampai-sampai mengundang kampung tetangga yaitu Kampung Layat.

Tugas Ongol lawan Anang Gabau jadi panitia. Nang jadi ketuanya to pasti Haji Untat, wakilnya Haji Nahap, sedangkan Haji Lului lagi sakit gigi.

Akhir pekan tadi, cuacanya panas banar kelimbahan kebanyakan peserta banyak nang bekipas, ada nang bekipas pakai kerudung amun bebiniannya sedangkan lelakiannya pakai kupiah tuam. “Coba ikam lihat Ngol, banyak bebiniannya aur bekipas ja tumatan tadi, maklum pang panas banar harinya,” ujar Anang Gabau. “Kada kawa ai, dasar harinya jua ah nang panas,” sahut Ongol.

Rupanya panas membuat Ongol mencari wadah gasan benaung. “Aku kesana walai, handak benaungai panasnya bilang liwar banar bisa menggurak otak dapatnya,” ujar Ongol. “Up to you ja Ngol, asal jangan bulik ja ikam,” sahut Anang Gabau. “Kada ah, kita kan panitia,” ujar Ongol.

Handap kisah, waktu sudah menunjukan pukul 10.23 Wib, angin mulai berhembus kencang bahkan tenda wadah gasan benaung para peserta ada nang terkirap alias terbang, apada tekuriak bebiniannya. “Panaaaaaas, panaaaaaaaas,” kuriak Siti Asoy. Melihat tenda terbang tadi behancap Anang Gabau membujuri dibantu Dangdut lawan Utuh Lengkor.

Kemana si Ongol? Sekalinya inya ne lagi mehantup makanan kotak dibelakang dinding panggung. “Aur begawi ja, bebila makannya,” garunum Ongol pina telihat komat kamit muntung maklum bedapat lawan makanan beisi ayam goreng. Lalu kada tapi mendangar paan orang lagi nang bekuriakan tadi.

Rahatan menyantap ayam goreng dibelakang dinding belakang panggung, angin bertiup kencang. Hitungan detik begoyang dinding panggung dapatnya. “Hau adapa ne pina beguyang banar,” garunum Ongol. Bebaya handak bediri sekalinya dinding tadi, bruaaaak, rabah, pas menindihi Ongol nang rahatan makan tadi.

Melihat dinding dibelakang panggung rabah, lalu bebuhan Anang Gabau, Dangdut lawan Utuh Lengkor bukah kebelakang handak membujuri dinding tadi. Bebaya meangkat harau takelipik bebuhannya. “Astaga, Ongol tetindih walai,” ujar Anang Gabau nyaring banar bepander.

Mendangar suara Gabau tadi, harau hibak bebuhannya mendatangi kebelakang panggung handak melihat Ongol nang tetindih dinding tadi. “Apa ikam ulah Ngol,” takon Haji Nahap umpat jua melihat. “Anuah Ji, lagi makan,” sahut Ongol. Mendangar sahutan Ongol tadi harau mengangkang bebuhannya. “Ha ha ha ha pantasai tumatan tadi kada telihat, sekalinya mehantup ayam panggang,” ujar Haji Nahap.

Apada supan muha dapatnya. “Harau menyupani banar hidup, jaka tahu kada umpat paan jadi panitia amun kaya ini jadinya, jakanya ditindihi bebinian tenyaman jua ne ditindihi kayu lenyak muha,” garunum Ongol sambil menutupi muha lawan kupiah hirang. (fin)

Sumur Karing

KEBAKARAN lahan di Kampung Liur membuat bebuhan kampung umpat jua mehamuk. Tapi mehamuknya kada memecahkan kaca lawan bekelahian melainkan mehamuk lantaran sumur gasan mandi lawan minum habis disedot pemadam.

Gara-gara habis disedot tadi harau handak sekampungan kada mandi lawan betetapas baju selawar. “Kemana juakah mandi ne, sumur karing lawan banyu leding kada jalan harau kiamat dapatnya,” ujar Anang Gabau. “Jangan kaya itu, kiamat masih jauh,’ sahut Ongol.

Sumur karing supaya dapat banyu lagi lalu Ongol lawan Anang Gabau mencoba menabuk menambahi dalamnya sumur. “Kita tambahi dua meterkah, kalo ai ada banyunya,” ujar Anang Gabau. “Bisa, tapi siapa nang dibawah,” takon Ongol. “Begantian tuam kita,” sahut Anang Gabau.

Handap kisah, pas takena giliran Ongol didalam sumur. Datangai Haji Untat lawan Haji Nahap. “Sumur mana jar karing gara-gara dipakai gasan menyiram kebakaran semalam,” takon Haji Untat. “Tunah dihadapan pian,” ujar Anang Gabau. “Berapa meter gerangai dalamnya to,” takon sidin. “Lima meter ja Ji ai,” sahut Anang Gabau.

Rahatan betakon dalamnya sumur Haji Nahap ne menimbah tanah kedalam sumur. “Ditambahi ja Ji ai, lima meter lagikah pastiam dapat mata airnya lagi,” ujar Haji Nahap pina musti banar tapi tangan tatapai menimbah tanah kedalam sumur.

Nah rahatan menimbai tanah kedalam sumur tadi lalu tedangar suara meaduh lawan meakai. “Hau suara apa to pina tedangar meaduh lawan meakai,” takon Haji Nahap penasaran. “Ada Ongol didalamnya lagi menabuk sumur menambahi,” sahut Anang Gabau.

Merasa penasaran lalu Haji Nahap menjanguk lewat atas, bebaya menjanguk harau betepal muha sidin kena tawak lawan tanah licak apada berot muha dapatnya. “Mataku, mataku picak,” ujar sidin sambil menyapui muha lawan sorban.

Melihat muha betepal lawan licak pas ditawak Ongol tumatan dalam sumur harau mengangkang Haji Untat. “Makanya jangan menimbai sembarangan kedalam sumur. Buktinya ikam kena tawakan penunggu sumur. Ha ha ha ha,” ujar sidin sambil ketawa sampai tepacul kupiah saking behimatnya mengetawai Haji Nahap tadi.

Kada berapa lawas mencongolai Ongol. “Mana Haji Nahap tadi, pina nahap banar menimbai tanah kedalam sumur kada tahunya aku lagi menabuk,” ujar Ongol. “Takena mana ikam ditawak Haji Nahap tadi,” takon Anang Gabau. “Dongkrak ne nah,” sahut Ongol sambil menunjuk kebawah. “Kenapa bisa kena disitu, tu,” takon Gabau pulang. “Rahatan handak bekamih kada kawa lagi menahan walai,” padah Ongol.

Mendangar kisah Ongol tadi harau, betambah mengangkang Haji Untat. Haji Nahap nang merangot gin umpat jua mengangkang lalu kada ingat lagiam lawan tabukan sumur karing tadi. Kelimbahannya harau menunggu hujan turun jua ai. “Banyaki lawan doa ja biar hujan lakas turun,” ujar Haji Untat sambil menahan sakit parut ketuhukan ketawa tadi. (fin)