Menyorangan

Rupanya Halal bihalal wadah Haji Untat semalam belanjut maklum masih banyak nang belum sempat datang kerumah sidin. “Pas banar nah acara wadah sidin masih belanjut,” garunum Ongol. Rahatan menggarunum sorangan sekalinya lewat pulang Anang Gabau, tapi inya ne bedua lawan Utuh Lengkor.

Lalu ditagur Ongol. “Bawa badigadlah,” ujar Ongol. “Iyaam gasan menyaingi ikam tupang,” sahut Anang Gabau. Mendangar pina kada beres bedua ne harau bingung Utuh Lengkor. “Ada apa ne mirip kucing lawan anjing ja buhan ikam, bila bedapat pasti adu urat gulu,” takon Lengkor. “Amun kada kaya itu walai kada rami pang Kampung Liur,” sahut Ongol. “Harau dasar bujur jar ikam Ngolai,” ujar Lengkor hanyar paham ja.

Handap kisah, rupanya Ongol ne sudah hapal dimana keandakan iwak ayam panggang semalam lalu tinggal menuju ja. “Beapa ikam menjoor kedapur to Ngol,” takon Anang Gabau binggung. “Ada ja walai,” sahut Ongol mantap. Anang Gabau ne kada curiga paan. “Walah, paling-paling ke jamban membuang nang ada hanyar meisi pulang,” garunum Gabau.

Anang Gabau ne mulai curiga lawan Ongol. “Kenapa pina lawas banar kada mencongol paan muha matanya ne. Kadakah... kadakah ..,” ujar Gabau cinik memikirkan Ongol. “Ah lebih baik kebelakang jua,” garunum inya lagi.

Nah pas kebelakang harau tekajut. “Astaga, sekalinya mehantup menyorangan ikam ne. Bagi-bagi pang,” ujar Anang Gabau. Melihat Gabau kedapur umpat jua sekalinya Utuh Lengkor. Pas begumpalan bebuhannya didapur. “Waduhlah, sekalinya didapur bebuhan ikam. Akai-akai yah, ayam seikungan sekalinya dihantup pantasai behinip,” kisah Lengkor.

Merasa ketahuan harau supan jua Ongol. “Balas dendam walai, semalam kada dapat nah sekarang seikungan,” ujar Ongol memanasi bebuhannya. Apada masam muha Anang Gabau lawan Utuh Lengkor. Harau bemamai limbah bulik. “Jakanya tahu langsung ja jua aku kedapur,” ujar Gabau. “Tapi kedahuluan Ongol,” sahut Lengkor.

Mau kada mauai, handak baelang lagi kerumah Haji Untat tapi sudah kemalaman. Handak esoknya tapi tadi malam pehabisannya. Lalu seraba salah tepaksa ai menerima. “Lain waktu kita sambung lagi,” ujar Gabau membuang supan.

Haji Untat selaku Halal Bihalal aur bejabat tangan ja bayangkan satu jam bisa 150 orang nang disalami sidin kalikan dua hari harau teselahu jua tangan sidin kelimbahan mengiyau Acil Kelilu gasan beurut. (fin)

Barabut Ayam Panggang

Hari semalam di wadah Haji Untat diadakan halal bihalal sesama rekan segawian sidin. Kada ketinggalan bebuhan kampung yaitu Ongol lawan musuh bebuyutannya Anang Gabau di undang Haji Untat. “Dapat undangan Haji Untatlah ikam Ngol,” takon Anang Gabau. “Dapat dong,” sahut Ongol saat bedapat Anang Gabau nang handak menuju kerumah Haji Untat.

Undangan dimulai sejak pukul 06.30 sampai tuntung. “Jangan khawatir, halal bihalal ne sampai tuntung. Pokok sampai tengah malam gin digasak,” padah Haji Untat. Mendangar sampai tengah malam harau himung bebuhan Ongol. “Asyiiiik, kawa jua makan tengah malam,” sahut Ongol. “Tapi, ujar Haji Untat pulang, amun makanannya masih ada, bila habis kada kawa jua,” ujar sidin menambahi. Apada masam muha Ongol dapatnya.

Lalu Haji Untat mempersilahkan bebuhan Ongol lawan rekan segawian sidin mencicipi makanan nang sudah disiapkan didalam ruangan tamu. “Silahkan,” ujar sidin. Mendangar disilahkan tadi harau menjoor ja Ongol lawan Anang Gabau. Rupanya mata Ongol melihat ayam bepanggang lawan irisan ayamnya nang ganal harau berabut lawan Anang Gabau. “Aku duluan, aku duluan,” ujar Ongol. “Duluan siapa, coba ikam lihat tangan ku ne sudah menjapainya am,” sahut Anang Gabau kada mau kalah jua.

Rupanya rahatan tumbur lawan irisan iwak ayam nang ganal tadi terdangar Haji Untat. “Jangan tapi berabut paan nangkaya kekanakan ja. Ambil kebelakang sana to masih banyak,” padah sidin. Mendangar didapur masih banyak harau behancap bedua ne menuju dapur. lalu betakon lawan Acil Jablay. “Cil, masih adakah iwak ayam bepanggangnya,” takon Ongol. “Habisam Ngolai, maka diandak diatas meja luaram semuanya,” padah sidin. Mendangar kisah sidin tadi harau masam muha Ongol lawan Anang Gabau. “Harau dibongoli Haji Untat,” ujar Ongol. “Iyaam,” sahut Anang Gabau.

Lalu bedua ne bebulik pulang keluar, rahatan mencari iwak ayam bepanggang tadi. Betapa tekajutnya Ongol lawan Anang Gabau sekalinya sudah ada dipiring Haji Nahap. “Harau sial kita ne Ngolai, sekalinya iwak ayam nang kita incar tumatan tadi diambil Haji Nahap,” padah Anang Gabau. “Gara-gara ikam ne pang, berabut,” ujar Ongol.

Harau bedua ne aur betangkar ja tumatan tadi, kelimbahannya bebuhan Haji Lului lawan Haji Nahap nang teimbai bebuhan Ongol tadi bulikan. Lalu tetinggal bebuhan Ongol ja. “Kaya apa am ne, bebuhan pehajian to bulikanam, tinggal kita ja,” ujar Anang Gabau. “Lebih baik bulik jua kita daripada supan,” rayu Ongol.

Lalu bebuhan Ongol umpat jua bulikan. Harau seikung-ikung kedida nang makanan amun berabut iwak ayam bepanggang tadi pang padahal ada ja iwak karing lais. “Jaka tahu makan iwak karing lais ja aku tadi, sempat jua makan daripada meharap iwak ayam bepanggang tapi berabut,” ujar Anang Gabau menyindir. “Jaka tadi, ne sudah bulikam walai. Ya makan dirumah masing-masingai,” sahut Ongol pina mehulu lawan Anang Gabau. (fin)

Tayammum

Musim kemarau terjadi jua di Kampung Liur, handak mendua bulan ne am bebuhan kampung kesulitan mencari banyu. Jangankan gasan minum lawan betetapas, handak bewudu gin ngalih banar, tepaksa nang handak sholat betayammum. “Bisa jua ikam betayammum to Ngol,” takon Haji Untat. “Bisa, nyaman ja tuah,” sahut Ongol pina musti banar.

Kada berapa lawas tedangar suara azan Juhur di masjid jami Kampung Liur. “Allahu akbar Allahu akbar,” ujar suara nang keluar dari speker corong masjid. Mendangar azan sudah berkumdang lalu Ongol berwudu. “Teingat aku betayammum to menggunakan debu nang berikit didinding,” garunum Ongol cinik memikirkan cara betayammum tadi.

Merasa kada yakin dengan debu nang berikit di dinding lalu Ongol bukah keluar masjid. “Handak kemana ikam,” tagur Haji Nahap. “Tayammum,” sahut Ongol sambil memacul lawan kupiah. “Beapa diluar sana, didalam masjid ne gin bisa ja,” sahut Haji Nahap. “Kurang afdol,” sahut Ongol pina mantap banar lawan pander.

Kada berapa menit tedangar suara iqomad. “Hayya ala sholat hayya alal falah,” ujar suara tadi nang sempat didengar Ongol. “Akui lajunya,” garunum Ongol sambil meratakan debu dimuha.

Tuntung sholat Juhur lalu besalaman, bebaya melihat muha Ongol harau tekelipik Haji Untat lawan Haji Nahap. “Bepupur apa ikam Ngol, muha hibak lawan debu,” takon Haji Untat. “Betayammum,” sahut Ongol. “Kenapa pina betepal lawan debu muha ikam to,” takon Haji Untat pulang. “Hau kaya apa lagiam, betayammum to memang pakai debu,” sahut Ongol kada mau kalah lawan Haji Untat.

Lalu Haji Untat menjelaskan. “Aku rasa ikam to tesalah betayammumnya, nang bujur to telapak tangan diandak kemudian diusapkan kemuha secara merata, habis itu tangan, telinga lawan batis to kada usah paan,” ujar sidin. “Tapi Ji ai, ulun rasa Ongol ne behimat banar mengasai debu kemuhanya makanya telihat pina betepal lawan debu,” ujar Haji Nahap menambah.

Mendangar penjelasan dari Haji Untat lawan Haji Nahap tadi harau masam jua muha Ongol. “Inggih Ji ai, ulun kira to debu diambil beberapa kali lalu diusapkan kemuha, tangan, telinga lawan batis. Sekalinya kada paanlah,” sahut Ongol pina supan. Mendangar penjelasan Ongol tadi harau mengikik bebuhan Anang Gabau. “Hahahaha, makanya jangan peragah bisa. Amun kada bisa betakon kada ngalih paan betakon to amun kada paham,” ujar Anang Gabau. Harau supan sana sini Ongol dapatnya. (fin)