Tatak pantan

Haji Untat lawan Haji Nahap handak meresmikan Aula Kampung Liur lantai II. Kebiasaan bebuhan kampung to sebelum diresmikan diadakan tatak pantan. “Pian menatak pantan dulu Ji ai, hanyar bisa masuk,” ujar Ongol sambil meunjuk parang. “Akui parangnya ne, halus banar,” sahut Haji Nahap.

Setelah dibacakan beberapa doa suci, lalu Haji Untat ne dipersilahkan menatak pantan tadi. “Nah sudah dibacakan doa tadi, silahkan pian menataknya am,” ujar Ongol nang jadi pemandu penatakan pantan.

Handap kisah, pina tepaluh dingin Haji Untat ne menatak pantan nang ada dihadapan sidin. “Akui, layat banar kayunya ne,” ujar sidin. “Pian ai nang kada kuat kalo ah,” sahut Haji Nahap pina tamam ja lawan pander. “Amun ikam kda percaya, nah ikam ja nang menataknya,” suruh Haji Untat.

Merasa disuruh sesepuh kampung lalu Haji Nahap mencoba menatak pantan tadi. Kada berapa menit bemamai jua sidin. “Harau dasar bujur jar pian Ji ai, kayunya layat banar,” ujar Haji Nahap. “Kenapa Ji, handak setengah jaman belum pagat jua pantan to,” takon Anang Gabau ajudan Haji Untat.

Lalu Anang Gabau melihati parang nang gasan menatak pantan tadi. “Astaga, parangnya Ji ai nang tumpul,” padah Anang Gabau. Mendangar pander inya ne tadi harau masam muha Haji Untat lawan Haji Nahap. “Harau dibongolinya kita, pina behimat banar menatak sampai tepaluh-paluh sekalinya parangnya tumpul,” ujar Haji Untat.

Apada supan ganal Ongol. Sekalinya nang diunjuki Ongol ne tadi parangnya sudah kada bemata parang lagiam alias rata. Pantasai sampai rempang pantan digasaknya parang tumpul tadi. Harau hinip Ongol. Supan muha. (fin)

Mentraktir Cewek

Beisukan to pina santai banar Ongol beduduk di warung Acil Jablay sambil memesan segelas teh hangat. Anang Gabau lawan Utuh Lengkor umpat jua bedudukan sambil bekisahan tentang harga pekat nang selawasan ne kada naik-naik padahal itulah napas hidup bebuhan Kampung Liur.

Kebanyakan bekisah parut pina lapar lalu Ongol ne memesan nasi kuning. “Nasi kuning iwaknya haruan kada besambal paan Cilai,” ujar Ongol. “Iwak haruannya tetinggal kepalanya ja nah, kaya apa,” takon sidin. “Bebarang ja Cilai, nang penting iwak haruan,” sahut Ongol.

Bebuhan Anang Gabau ne kada mau kalah memesan jua nasi kuning. “Sama Cilai, ulun iwaknya ayam besambal habang,” ujar Anang Gabau. “Ulun iwaknya hati,” ujar Dangdut. “Minumnya pang,” takon sidin. “Teh hangat,” sahut bebuhannya beimbai.

Handap kisah, rahatan asik-asiknya makan nasi kuning kada sengaja Ongol ne melihat cewe berambut panjang terurai, mantap tupang bodinya. “Wal, coba ikam lihat dibelakang sana tunah,” ujar Ongol pina begamat banar bepander. “Tahu ai, kenapa,” sahut Anang Gabau. “Kada papa ai,” ujar Ongol pina tamam lawan muha.

Kada berapa lawas tedangar suara cewe ne tadi handak membayar nasi kuning nang dipesannya tadi. “Berapa semuanya Cil,” ujar cewe berambut panjang ne tadi. “Ehemm, kada usaham Cilai, biar ulun ja nang membayari,” ujar Ongol sambil bediri mendatangi bebuhannya.

Pina telihat binggung pang cewe ne. “Aduh Bang, kada usah ginai, banyak ah ne,” ujar cewe. “Tenang ja Dingai, biar Abang ja nang membayari,” gasak Ongol. “Bujuran ah Bang,” takon cewe memastikan bujur atau kadanya hakon membayari. “Pokoknya Abang ja nang membayarinya,” ujar Ongol pina nahap banar lawan pander. “Kalo kaya itu Bangai, terimakasihlah, Abang baik banar deh,” sahut cewe ne sambil mengijipkan mata.

Melihat dikijibi bebinian bujang harau himung Ongol. “Akaiyah, asa damai dunia,” ujar Ongol pina tamam. “Bang terimakasihlah, jangan jara,” kuriak cewe ne lalu tulak kemana kada tahu jua sambil membawa 5 plastik ganal bungkus nasi kuning.

Lalu Acil Jablay betakon. “Bebujur ikam Ngol, pina musti banar membayari cewe kada dikenal,” ujar sidin. “Sekali-kali ah Cil, biasa kesan pertama. Siapa tahu inya jatuh cinta lawan ulun,” sahut Ongol. “Inya tadi Ngolai, memesan nasi kuning sebanyak 50 bungkus, gasan karyawan makan pagi ne,” padah Acil Jablay.

Mendangar pander sidin bahwa cewe tadi memesan 50 bungkus harau ngalu kepala Ongol. “Akui, ganalnya duit nang akan ulun bayar,” ujar Ongol. “Semuanya dua ratus lima puluh ribu,” sahut Acil Jablay kada tetahu paan muha. Mendangar penjelasan sidin tadi kada berapa lawas harau mendabuk, siup. Apada habut bebuhan Anang Gabau meurus Ongol siup.

Dikira Ongol ne cuma makan nasi kuning sepiring ja, sekalinya memesan 50 bungkus dikalikan lima ribu sebungkusnya, apada tujah. Dua hari kada karuan rasa, amun duit gasan bini menukar baras lawan iwak dirumah habis ditukarkan pakai cewe tadi. (fin)

Bakas Cupang

Rahatan bedudukan di warung Acil Jablay, Ongol ne jadi perhatian bebuhannya. “Akuilah, pina behimat banar tadi malam,” tagur Anang Gabau nang umpat bedudukan jua lawan Dangdut sambil memesan es jeruk. “Biasa, sunnah rasul, apalagi malam dingin hujan labat harau kada tedangar tupang nang lewat,” ujar Dangdut pina tamam menyambati Ongol.

Nang ngaran Ongol ne kada paham paan apa nang dipanderi bebuhannya tumatan tadi. “Aneh bebuhannya ne, setumat-tumat memanderi aku, apakah aku ne idola bebuhan ikamkah,” ujar Ongol pina peragah kada tahu paan. “Waduh ikam ne Ngol, bepadah kada tahu pulang ah,” sahut Anang Gabau. “Iih, pina musti kada tahu,” sahut Dangdut menambahi.

Handap kisah, setiap nang datang ke warung Acil Jablay rahatan melihat Ongol pastiam bebuhannya menyambati. “Ganas banar malam tadilah,” ujar Haji Untat umpat jua menyambati pas kebelujuran sidin handak menukar roko cap pekat. “Aneh banar, ada nang menyambat ganas, ada nang menyambati pina behimat. Apa maksud bebuhannya ne,” garunum Ongol pina cinik bepikir mencari nang disambati bebuhannya tadi.

Merasa pina penasaran lalu mewanikan diri betakon. “Aku handak betakon jujur ja lawan bebuhan ikam ne, kenapa aur menyambati aku tumatan tadi,” takon Ongol. “Hau, masa ikam tahu paan,” sahut Dangdut. “Peragah kada tetahu pulang inya to walai,” ujar Anang Gabau. Apada betambah penasaran banar Ongol.

Rupanya Acil Jablay ne kada tahan jua melihat kelakuan Ongol pina kada tahu paan lawan nang habang digulu. “Dimaksud bebuhannya to Ngolai, cupang digulu ikam tuah, habang banar,” padah Acil Jablay tadi. Mendangar cupang apada masam muha Ongol. “Astaga, inikah nang disambati bebuhannya tumatan tadi,” sahut Ongol sambil menyapu lawan tisu.

Melihat kelakuan Ongol tadi harau mengangkang bebuhannya. “Hua ha ha ha, kada kawa dilap paan to walai,” ujar Anang Gabau. “Apalagi dibari odol betambah habang tupang, kemungkinan bisa jadi kunat,” ujar Dangdut pina behimat banar menyambati Ongol.

Merasa pina kada karuan rasa, mau kada mauai bukah keluar warung. “Daripada jadi bulan-bulanan sambatan bebuhannya lebih baik melarikan diri,” garunum Ongol. Harau semingguan kada keluar rumah. Supan muha, cupang telihat pina habang banar digulu. (fin)

Gelisah Guring

Tahun baru sudah berlalu, meski suasana malam penyambutan pergantian tahun di Kampung Liur kada hujan tapi kiamat bagi Ongol rahatan handak guring didalam kamar. Suara terompot nang dipakai anak aur bebunyi ja tetarusan. “Disadangiam nakai, abah ne ngalih nah guring,” tagur Ongol. Tapi nang ngarannya Utuh Lantui ne tatapi kada tetahu paan lawan muha meumpati gaya abah pina tamam.

Rahatan mata handak bepajam, tedangar suara, preet, apada tebangun pulang Ongol ne. “Sudaham bebunyian to,” kuriak Ongol tumatan kamar. “Inggih,” sahut Lantui sambil menyapu liur rahatan meniup terompet nang ganal tadi.

Handap kisah, suara semakin betambah banyak rahatan Haji Untat lawan Haji Nahap baelang kerumah Ongol. Preeeeet, pret, preeeet, suara terompet Haji Untat. Mendangar suara terompet bebanyak tadi harau habang muha Ongol. “Siapa lagi nang meniup terompet nyaring banar tuah,” kuriak Ongol pina nyaring banar.

Mendangar kuriak Ongol pina nyaring didalam kamar harau tekajut Haji Untat lawan Haji Nahap. “Nah, kekanakan ne kada bangun jualah,” garunum sidin sambil menuju kekamar Ongol nang pina gelisah guring. Preeeeeeeeet, dihadapan Ongol tuam Haji Untat meniup terompetnya. Mendangar bunyi terompet diparak lubang telinga harau tekelipik Ongol. “Jangan kaya ituah nak, abah ne handak guring nah, tadi malam tupang begadang sampai subuh,” ujar Ongol.

Mendangar pander Ongol tadi lalu Haji Untat bepander. “Hehehehehe, begadang behimat tadi malam lah,” ujar sidin. Mendangar suara Haji Untat harau tekajut Ongol. “Astaga, piankah Ji,” ujar Ongol. Pina tekajut-kajut nangkaya melihat hantu ja. “Iyaam, kenapa,” takon sidin. “Kada ai, ulun kira tadi anak ulun nang mengayai tumatan tadi, sekalinya pian,” ujar Ongol pina supan muha.

Harau seraba salah Ongol dapatnya. “Kedida gunanya bejagaan sampai subuh gara-gara menyambut tahun baru, lebih baik diperbanyak amal dan ibadah kita,” ujar sidin menasehati. Kelimbahannya sidin mengeluarkan duit gasan Ongol. “Ne bonus akhir tahun, jangan dipandang besar nilainya nang aku bari tapi ini tulus dan ikhlas gasan ikam dan keluarga ikam, semoga dimanfaatkan dengan sebaik-baiknya,” pesan Haji Untat.

Tuntung menerima duit, Haji Untat lawan Haji Nahap bulik lalu Ongol menaruskan guringnya meskipun ditengah suara terompet nang tiap beberapa menit ditiup Utuh Lantui. “Sudah guringam abah ma ai,” ujar Utuh Lantui. “Kenapa,” takon umanya. “Ulun bari obat bius diminuman sidin tadi,” padah Utuh Lantui. (fin)