Bejual Janji

HARI semalam di Kampung Liur diadakan kampanye tentang visi dan misi pembakal kampung. Kampanye diadakan di aula Kampung Liur di parak rumah Haji Untat. Merasa ada nang meadakan kampanye di Aula lalu hibak buhannya mehadiri acara tersebut. “Hanyar wayah ini ja pina rami banar di kampung kita ne Ngol lah,” ujar Anang Gabau. “Bujuram to walai, tapi nang ngarannya calon pembakal pasti inya to bejual janji,” sahut Ongol pina musti banar.
Nang datang di kampanye itu temasuk bebuhan pe-Acilan nangkaya, Acil Jablay lawan Acil Kelilu. “Janji apa juakah nang handak disampaikan buhan calon pembakal kampung kita to,” takon Acil Jablay. “Paling meurus harga pekat lawan gatah supaya naik,” sahut Acil Kelilu. “Kada mungkin Cilai, amun menurut ulun pasti mencari gawian nang tenyaman,” ujar Acil Jablay.
Handap kisah, lalu maju ai Haji Untat. “Bila buhan ikam memilih aku, aku bejanji gajih buhan ikam kunaikan 20 persen lawan pendidikan gratis,” ujar Haji Untat bejanji dihadapan buhan kampung, lalu ai betapuk tangan buhannya. “Hidup Haji Untat, hidup Haji Untat,” kuriak Ongol nang jadi tim sukses sidin. “Bujurai Ngolai, sidin to masih hidup ujar sapa mati,” kuriak Acil Jablay, apada masam muha Ongol mendangar kuriakan Acil Jablay tadi.
Tuntung Haji Untat, lalu maju ai Haji Lului. “Amun aku kada tapi muluk-muluk paan, buhan ikam bila memilih aku kampung liur bebas warga miskin,” ujar sidin pina tebatuk-batuk, sekalinya rahatan bepander pina semangat banar mutung sidin temasuk lalat, apada tumbur buhan Dangdut. “Napa Ji, pina tebatuk-batuk, pian garingkah,” takon Utuh Lengkor temasuk tim sukses sidin. “Kada paan, temasuk lalat,” ujar sidin pina habang muha.
Rupanya kelawasan kampanye ada seikung nang teguring diparak Utuh Lengkor. “Oi.. ada maliiiingng,” kuriak Utuh Lengkor dihiga telinga nang teguring tadi. Mendangar kuriak ada maling apada tebangun lawan tekelipik nang teguring tadi, sekalinya Utuh Kalubut. “Mana malingnya, mana malingnya,” ujar Utuh Kalubut.
Melihat tingkah Utuh Kalubut ne harau mengangkangan ketawaan buhannya. “Kedida malingnya paan, ini ne lagi kampanye,” ujar Dangdut. Melihat pina rami buhannya mengetawai apada habang muha Utuh Kalubut, harau kada banyak bunyi lagiam tehinip nangkaya iwak sapat dipais. (fin)

salam kenal

Ngaran ulun arifin, kiyauan ifin, asalnya sampit, tambuninya gin dipatak di sampit jadi kada heran kalo nang ngarannya ifin ne sudah dikenal lawas dari nang behingusan sampai ke nang kada begigi lagi, he, he, he, (emangnya selebritis ).

Aku ulahkan kisah si ongol (kisah fiktif warga sampit) ne agar para pembaca koran radar sampit ato buhan nang ada di kalimantan ne bisa tehibur lawan ketawa sampai teliur-liur karena kisah si ongol ne asli kampung liur.

Ulun padahkan, kisah si ongol ne adalah kisah gabungan beberapa bahasa yakni bahasa sampit, banjar, lawan Indonesia jadi tepangkung-pangkung bahasa nang penting nyaman dibaca lawan mudah di pahami. dan kisahnya ne sudah ada lawas banar di koran kebanggaan warga sampit yakni SKH Radar Sampit spirit baru kotawaringin.

Selamat membaca, jangan lupa siapkan anduk halus kaloai teliur kena ngalih melapnya pulang terpaksa lawan tangan ato lawan ujung baju, kalo perlu bari komentar nang sipatnya membangun.