Akar Pohon Beringin

TUNTUNG acara pencontrengan semalam, buhan Ongol dudukan diwarung Acil Jablay, maklum warung sidin ne am nang jadi langganan buhannya karena bisa beutang. “Kawa menambah utanglah Cil,” ujar Ongol. “Kada kawa lagi, sudah hibak catatan utang ikam to,” sahut sidin.
Kada berapa lawas mencongol Haji Untat. “Assalamu alaikum,” ujar sidin. “Wa’alaikum salam,” sahut buhannya. “Eh, Haji Untat, minum apa Ji,” ujar Acil Jablay menawarkan minuman. “Es teh ja, haus ne pang gara-gara semalam melayani buhan ikam mencontreng sampai hilang sandal japit,” kisah sidin.
Handap kisah, rupanya tuntung memanderi masalah pencontrengan semalam, lalu Anang Gabau membuka baju. “Akuilah tato kita to wal, pina tangar banar,” tagur Dangdut. “Bahari to walai, bakas takut ji kita ne,” ujar Anang Gabau pina nahap banar. Mendangar bakas takut harau hinip Dangdut. “Iyakah,” sahut Dangdut kada banyak bunyi lagiam padahal Anang Gabau ne begayaan ja lawan pander.
Rupanya Ongol ne panas jua melihat kekawalan bepacul baju, maka masing-masing melihatkan otot. “Tato lawan otot ganal buhan ikam to walai kedida apa-apanya pang lawan ampun aku ne,” ujar Ongol. “Hau apanya Ngol,” takon Anang Gabau penasaran banar. “Ada ja,” sahut Ongol singkat. “Hau, bebujur ikam Ngol, penasaran nah,” gasak Anang Gabau.
Lalu Ongol menyuruh buhannya beparak. “Dilengan ku ne walai, dulu ada tato pohon beringin tuha,” ujar Ongol. “Mananya, kada kelihatan to,” sahut Dangdut temasuk Haji Untat umpat penasaran jua sidin. “Nah kada percaya buhan ikam ne,” ujar Ongol pulang. “Mana percaya ah, buktinya gin kedida paan bakas tato jakanya ada kelihatan am eh,” sahut Anang Gabau.
Lalu Ongol mengisahkan. “Bahari to walai pohon beringin tuha dilukiskan oleh pekaian, nah sekarang, pohon beringinnya to sudah ditabang karena sudah ketuhaan lawan behantu, jadi nang tersisa to akarnya ja,” ujar Ongol. “Mana akarnya Ngol,” takon Haji Untat umpat penasaran banar rupanya sidin ne. “Ini nah,” ujar Ongol sambil menampaikan bulu ketiak.
Melihat Ongol menampaikan bulu ketiak, harau masam muha buhannya, ada nang tewahin-wahin mencium bau ketiak ada nang menagok liur ludah sorang. “Harau dibongoli Ongol,” ujar Haji Untat umpat dibongoli jua. (fin)