Kipas di rumah sudah hancur lalu Ongol beniat handak menukar nang hanyar mengganti nang rusak tu tadi. Urang nang bejual kipas neh kedida bejual dipasar iwak paan melainkan dipasar khusus bejual gasan keperluan rumah tangga.
Pina santai pang Ongol ne tulak menuju pasar Kampung Liur tapi melewati warung Acil Jablay. “Hau, kemana Ngol,” tagur Anang Gabau nang kebelujuran ada diwarung sidin. “Handak kepasar menukar kipas walai, mun kipas dirumah sudah hancur eh paksa ai menukar nang hanyar lagi. Umpatkah,” sahut Ongol. “Umpat dong, siapa tahu bedapat binian bengkeng, wakakak,” ujar Anang Gabau. “Huh, dasar bujang lapuk. Kepasar tu nang dicari tu binian tu am,” sahut Acil Jablay. “Iya dong,” ujar Anang Gabau.
Kada berapa menit sampai jua bedua ne ketempat tujuan, sampai disana langsung ja menuju ke toko penjual kipas. “Cari apa Bang,” sahut penjual kipas nang bengaran Siti Asoy. “Cari kipas, adakah,” sahut Ongol. “Banyak Bang, ada harga seratusan sampai dua ribuan. Tinggal pilih ja pian,” ujar Siti Asoy menawarkan kipasnya. “Nang paling murah ja, nang dua ribuan,” sahut Ongol sambil meunjuk wan duit dua ribuan.
Handap kisah, sebelum bulik kerumah Ongol wan Anang Gabau singgah ke warung Acil Jablay imbah menukar kipas tu tadi. “Berapa Ngol harganya,” takon Acil Jablay. “Kawa menukar nang dua ribuan ja Cil ai,” sahut Ongol. “Kenapa kada nukar nang telarang dikit. Kawa jua telawas memakainya daripada nang murah,” ujar sidin. “Kada tapi ada duitnya lagi am Cil ai,” sahut Ongol pina membari maras banaran. “Coba ai dulu,” ujar Anang Gabau.
Lalu Ongol mengipas-ngipasi kipasnya, bebaya 5 kali kipas harau tepacul kipasnya. “Hah, kipas pacul walai,” ujar Anang Gabau. Melihat kipas tepacul baya 5 kali kipas harau habang muha Ongol. “Bah iya pang, kada asli,” ujar Ongol pina masam muha. “Bulik akan ngolai, rugi ikam dua ribu mun kipasnya rusak baluman lawas dipakai,” ujar Anang Gabau mengompori Ongol.
Apada, behancap Ongol tulak lagi ke pasar Kampung Liur didangani Anang Gabau. Kada berapa sampai am buhannya ke toko Siti Asoy. “Kaya apa ne, baya 5 kali kipas rusak am,” ujar Ongol pina telihat muha habang. Lalu Siti Asoy menjelaskan. “Mun harga lima ribuan tu kipasnya nangkaya ini ne. Mun nang dua ribuan kipasnya didiamkan kepalanya nang digelengkan sana sini,” ujar Siti Asoy.
Mendangar penjelasan Siti Asoy tadi, harau masam muha Ongol wan Anang Gabau, lalu bulik kada permisi lagi. “Bujur inya jua Ngolai, pantas ai 5 kali kipas rusak mun salah aturannya eh. Seharusnya kepala ikam nang bekipas sana sini lainan kipasnya nang dikipaskan sana sini, hahahaha,” ujar Anang Gabau mengayai Ongol. (fin)
